Aizawl: Geology & Mineral Resources department mi thiamte chuan tun hnaia lei chetna hmun Thiak leh Tuirini bul te chu an enfiah. Geology & Mineral Resource Department a Joint Director Lalbiakkima’n Zalen a hrilh danin tun hnaia nasa taka lei tawlh Thiak khaw bula mi chu an enfiahna ah a chung/lei pawn ft.2/3 vel chu lei pangngai niin a chhung ft 8 vel chu lung pialtlep ang chi a ni a. Ruahsur nasaah tui nasa takin leiah a lut a, chu chu pialtlep lung chungah inchhekkhawlin tui a tam avang leh luanralna tur a awm tak loh avangin a min ta nia an hriat thu a sawi. Aizawl-Champhai kawng, Tuirini bula kawng nasa taka pawng chhuak chu a chhakah leitawlh a awm a, chu leitawlh rawn chhuk chu a thlang deuha zawlin a lo nek ve si a, tawlh tlang zel thei lovin kawngah a rawn invawrhchhuak nia an hriat thu Zalen a hrilh bawk. Lalbiakkima chuan Mizoram leilung chu awihtlan a nih avangin ruahtui a tlak tam chuan harsatna thleng a tam thei thin niin a sawi bawk.