FLOYD_A THIHNA THUBUAI

1. Police kuta Floyd-a thihna chungchang ngaihtuah a nih lai hian a unaupa, Terrence Floyd chuan a thattu chu a na thei ang ber, kum 40 tantir a phut thu a sawi.
   “Engvang nge? Engnge in ngaihtuah? Ka unaupa hrawka thingthit a nih lai khan engnge in rilruah in lo ngaihtuah?” a ti.
    Floyd-a fanu kum sarih mi, Gianna-i chuan video recording hmanga inlanin a pa chu a ngaiin a hmangaih tih a sawi.
   “A chungchang hi ka sawi reng a ni,” a ti a. “Ka pa khan ka ha nawt pawh min pui thin a ni,” a ti bawk.
   Judge chuan thubuai chuan khawtlang leh ram rilru a tina a, a bikin Floyd-a chhungte a tina tak zet tih a sawi.
   “Hremna hi a kaihhnawih thil thlengin rilru a hruai avanga siam a ni lo va, chhungkua a tihbuai zawng zawngte rilru kan hriat thiampui a, a bik takin Floyd chhungkua kan ngaihtuah a ni,” tiin Judge Peter Cahill chuan a sawi.
   Chauvin-a hian court-ah hian Floyd family chhungkua a tawrhpui thu a sawi a, nakinah thu pawimawh dang phawrh tur a la awm dawn tih a sawi a, chu chuan thil muanawm zawk a thlen a beisei tih a sawi.
   Ngaihdam erawh a dil lo.
   Court-ah hian Chauvin-a nu chuan a fapa chu mi tha tak a nih thu a sawi bawk.
   “Sualna i nei lo tih leh i ni ngai lo tih hi ka ring tawk a ni,” tiin Carolyn Pawlenty hian a sawi.
2. Chauvin-a hremna pek hi thihna thleng avanga police officer hluiin hremna a tawrh rei ber a ni dawn tih Minnesota Attorney General Keith Ellison chuan a sawi.

United States police officer hlui, May, 2020-a Minneapolis African-American George Floyd thattu chu kum 22 leh thla ruk chhung lung in  tang tura hrem a ni.

Judge chuan Derek Chauvin-a hremna hi ‘miin thuneihna leh rinna an neih a tihhmelhem avang leh Floyd-a chunga rawng taka a chet vang’ niin a sawi.

Kum 48 mi, Floyd-a hi Chauvin-a hian a nghawngah a khupa thutin a hnu minute kuaah a thi.

Mihang chunga police officer chet dan hian khawvel pum deng chhuakin chi inthliarna rawngkai leh police-te an mi man laka rawng taka an chetna duh lohna lantir a ni.

Kum 45 mi, Chauvin-a hi tualthah leh thil dangah thla hmasa khan thiam loh chantir a ni a. A chungchang court-in a ngaihtuah lai hian a dan hre mi chuan mi a tihhlum dan chu ‘inringtawk tak chunga tihsual palh thleng vang’ niin a chhan.

Chauvin-a hi a dam chhunga ralthuam a kawl phalsak a ni lo bawk.

Amah leh a thawhpui officer dang, an hna atanga chawlhtir ve tawh thote chu Floyd-a dikna chanvo an rah behsak avangin hremna hrang theuh pek an ni.

Floyd chhungkua leh anmahni thlawptute chuan court thutluknaah an lawm thu an sawi.

“Hremna chhinchhiahtlak tak hian Floyd chhungkua leh kan ram chu dam lam pan turin pen khatin a pentir a ni,” tiin dan hre mi, Ben Crump chuan Twitter-ah a tar lang.

Floyd-a farnu, Bridgett Floyd chuan hremna puan tak chuan police chet dan rawng tak chu a tawpah chuan ngaih thutak a ni ve ta tih a sawi a, kawng thui tak erawh zawh tur a la awm tih a sawi.

President Joe Biden pawhin court thutlukna chu thil tih dan awm tak a nih thu a sawi a, chutih rual chuan he thil thleng hi thui tak a hre lem lo tih a sawi bawk.

FLOYD-a CHUNGA THILTHLENG

1. May, 2020 khan dawr pakhatah sikret a lei a, dawr nghaktu chuan pawisa lem a pe nia hriain police a ko va; mahse, Floyd-a hian a thil lei chu a pe kir duh lo.
2. Officer-ten a hmun an thlen chuan Floyd-a hi a car atanga chhuak turin an ti a, a kutah an phuar (handcuff) nghal a. An innawr nak nak a, Floyd-a chu te chungin squad car-ah dah luh an tum a. A tan ve avangin kawngpuiah titluin an thut zui.
3. Chauvin-a hian Floyd-a bawkkhup chu a nghawng hnung (tukhum)-ah minute kaw chuang a thingthit.
4. Thut beh a nih chhung hian a thawk theih loh thu vawi 20 chuang a sawi chhuak hman a, thlah tura a ngen pawhin an thlah duh lo va, a taksa pawh a zawi zui.
5. Ambulance a thlen chuan Floyd-a hi che tur a awm tawh lo va, darkar khat hnuah thia puan a ni ta a ni.
6. A chunga thil thleng hi hetih laia kum 18 mi, Darnella Frazier chuan video-in a lo la fuh a, ani hi a unau (cousin) nena a bul hnaia kal niin Floyd-a man a nih lai pawh hi a hmu.
7. A phone-a thil thleng video a lak hma hian  mi pakhat talbuai tak, a nunna tura zuah tura ngen a hmuh thu a sawi.