German champion Bayern Munich chuan Liverpool striker Sadio Mane chu lei ngei tumin hma an la zel a, hun hmasa lamah £21million bakah Champions League-a an champion chuan £4.6million pek an huam chu, £30million-ah sanin dawr nawn an tum niin Sportsmail chuan an tarlang. 

Boruak a inmun chhoh vut vut lai hian Liverpool lam erawh chuan an striker hi £42.5million tala hralh an inbeisei thung a. Kum 30 mi Mane thlak tur hian Liverpool hian Benfica lama khel mek kum 22 mi Darwin Nunez chu an hmu tai deuh nia sawi a awm bawk. Hetihlai hian Manchester United, Newcastle leh Paris Saint-Germain lam pawhin Uruguayan hi an rim ve mek a, Darwin Nunez hian season liamta chhung khan competition hrang hrang-ah game 41 khelin goal 34 a thun a ni. 

Mane hian Liverpool lamah kum khat contract a la nei mek a, hei vang hian a man a tlawm thei lo. Mahse, hralh lova tun season an chelh a nih vaih chuan nakum lamah free agent-in an chhuah a ngai tho maithei a, chuvangin an tan chuan tun nipuia chhuah tir mai hi a himin a rinawm.

Senegalese forward hian kar liamta khan press conference-ah Anfield a chhuahsan duh chhan ber chu, a hnam pui 60-70% bawrin Liverpool chhuahsan tura an duh vang niin a sawi a, Reds fans te chu a zah rualin a hnam puite duh dana zawm mai a tum thu a sawi lang bawk. 

Sportsmail lamin an tarlan danin, Mane chuan Liverpool lama a team-mate Thiago hnenah, Munich khawpui lama a in ngei a awm a, Bayern tana a khel thei a nih chuan a hma hun atan pawh a that zawk a rin thu a sawi. Liverpool tan hian kum 36 mi James Milner chuan kum khat dang cham turin contract a pawtsei tawh a, Naby Keita-a pawhin deal thar a siam ngei rin a ni.