Aizawl March 21, 2023 : Union Minister of Ports, Shipping and Waterways Sarbananda Sonowal chuan Mizoram Rajya Sabha MP K. Vanlalvena zawhna chhangin Assam rama Gharmura lei (bridge) NH 154 atanga Khamrang rama NH 54 bul thleng chu National Waterway 102 na atan puan a nih tawh thu Parliament Session neih mekah a sawi.

NW 102-a an puan chin hi KM 87.136 a thui a ni a, Khamrang leh Sairang inkar Tlawng lui erawh chu tui a thuk tawk loh avangin National Waterway no 102 hian a huam pha lo tih a tarlang.

Bay of Bengal tuifinriat kama Sittwa lawng chawlhhmun atanga Myanmar leh Mizoram inrina thlengin Chhimtuipui chu lawng zawh theiha siam tumna a awm em tih K. Vena zawhna chhangin Union Minister chuan, "Kolkatta atanga KM 539-a thui Sittwa lawng chawlhhmun chu NE state te tan pawha hman tangkai a nih theih nan Mizoram atanga KM 121-a thui Paletwa thleng KMMTTP Road laih mek a ni. Paletwa atanga Chhimtuipui lui mawng lam hi Sittwa thlengin KM 158 a thui niin hei hi Lawng zawh theih a ni. Hei hian NE state atangin India ram hmun dang panna tur kawngpui a siam belh dawn a ni," a ti bawk.

K. Vena zawhna dang chhangin Union Minister chuan Tlabung atanga Tuichawng inkar Khawthlang Tuipui tihhmasawn nan leh lui mawng tihfai nan cheng vaibelchhe 6.17 pawm a nih tawh thu leh first installment cheng vaibelchhe 1.23 chu pek chhuah a ni tawh tih a sawi bawk a ni.