ZALEN December 1, 2025: Chief Minister Lalduhoma hovin vawiin khan Mizoram Agricultural Marketing Board te chu CM Conference Hall-ah an thukhawm a, Mizoram chu NITI Aayog-in 'Ginger Capital of India'-a an puan avangin lawmthu an sawi. Sawhthing lei nan hian Mizoram sawrkarin kuminah Rs. 1,37,72,04,477.50 a seng.

He hunah hian November ni 24-a New Delhi-a neih zawh tak Mizoram sawrkar leh NITI Aayog buatsaih Stakeholders Consultation for Mizoram Ginger Produce chungchang report a ni a. Meeting kha Mizoram state puala New Delhi-a official meeting lian ber a la nia hriat a ni. Sawrkar laipuia Ministry hrang hrang aiawh leh sawhthing leitu leh process-tu investor 60 chuangten Mizoram sawhthing lei leh hralh chungchang inrawnkhawmna an nei a ni.

Consultation Meeting-ah khan NITI Aayog chuan Mizoram chu "Ginger Capital of India" ah a puang a. Hei hian Mizoram chu sawhthing quality tha neitu state a nihzia a ti chiang a ngaih a ni a. Mizoram chu India rama sawhthing thar tam state zingah a inhlang chho mek bawk a ni.

MAMB meeting chuan NITI Aayog chungah lawmthu a sawi a, sawhthing quality tha, chemical laka him ngei tharchhuak tura nasa zawka tan lak zel an rel. Chuvang chuan, kum thar lama Organic hmanga sawhthing ching thei tur khuate chu MAMB hnena in-report turin an ngen a, organic-a kalpui thei khuate chu Collection Center kaltlang kher lova, an khuaa leisak dan dap a ni ang. Kumina ching mek zingah pawh organic taka kalpui mek khuate chuan MAMB hi hriattir nghal tur a ni e.

Kumina sawhthing lei chin report pek a ni a. Sawhthing hi kg 3,38,35,182 lei a ni a, support price pek chhuah zawng zawng chu Rs. 1,37,72,04,477.50 a ni.

MAMB hian December ni 5-6 hian Aijal Club-ah sawhthing Buyer - Seller Meet nei turin hma a la mek a, India ram hmun hrang hrang atangin hetiang lama tui mite an lo kal khawm dawn a ni. He mi atana an inbuatsaihnate an thlir ho va, hmalak mekna chu tha an ti. Sawhthing thar lei thei tur hi Buyer - Seller meet lo awm turah hian inremna ziahpui theih beisei a ni.