ZALEN November 25, 2025: Mizoram sawrkar leh NITI Aayog, Government of India tangkawp chuan nimin khan Mizoram sawhthing tharchhuah pung chho mek chungchanga inrawnkhawmna leh sawihona ‘Stakeholders Consultation for Mizoram Ginger Produce’ chu New Delhi-ah an buatsaih.

Inrawnkhawmnaah hian sawrkar hotute leh industry aiawh mi 60 chuang an tel a, Chief Minister Lalduhoma chuan a telpui. NITI Aayog-in rawtna an siam danin Mizoram chu Ginger capital of India tih ni se, sawhthingte chu organic a nih zel theih nan hmalak zui zel ni se, technology sang zawk nena a processing lam kalpui dan kawng zawn ni se, India ram chhung chauh ni lovin ram pawna thawn chhuah kawngah pawh hmalak ni se, an ti a. An rawtnate chu chak taka bawhzui zel turin thutlukna an siam a ni.

He inrawnkhawmna hi Chief Minister, Council of Ministers leh NITI Aayog te nena duan chhuah a ni a, a thil tum ber chu Mizorama kuthnathawktute tharchhuah sawhthing lei leh hralh kawnga harsatna sut kian dan tur sawihona leh market tha zawk, loneituten an hlawk pui lehzual tur dapchhuah tumna a ni. Hetiang inrawnkhawmna neih vawikhatna nia hriat a ni.

Chief Minister chuan December 5-6, 2025 a Aizawla neih tur, sawhthing Buyer-Seller Meet-a rawn tel vek turin he huna kalkhawm Investor te chu a sawm nghal a ni.