Glastonbury Festival neih mekah rin loh takin American rock band Foo Fighters te an inan a, fans an chawk phur chiang hle. 

Khawvela contemporary performing arts festival lian leh ngaihven hlawh ber pawl Glastonbury hi June 21 atang khan tan a ni a, ni nga chhung a awh dawn a ni. He hunah hian khawvel huapa artist leh band lar ber ber an inlan a, an boruak a lian mep mep hle. 

Foo Fighters te inlan tur chungchang hi festival buatsaihtute chuan an lo sawi lang zauh tawh a, mahse thu chiang hriat tur a awm zui lo. Hengtiang karah hian stage-ah an inlan thut a, fans an sapatal a ni ber. Glastonbury Festival-ah hian English rock band Arctic Monkeys te chuan Zirtawpni zan khan headline an chang a, an perform hma hian Foo Fighters te hian entu mipui barakhain an rawn perform hmasa a ni. 

Foo Fighters hian drummer thar Josh Freese an nei a, ani ho hian an perform. An drummer lar Taylor Hawkins chu nikum khan a boral a, Josh Freese hian a hmun ruak a luah a ni. 

Glastonbury Festival hi UK-a an music festival lian ber a ni a, an ram band lar Arctic Monkeys chuan a vawi thum nan headline an chang a ni. Festival hi mi nuai hnih chuangin an chhim tawh a, a la tawp lo. Guns N' Roses, Elton John, Lizzo, Lil Nas X leh Lewis Capaldi te an inlan a, midang inlan tur eng emaw zat an la awm bawk - June 26-ah festival hi khar a ni ang.