Mizo rapper lar G'nie leh lemchan thiam Papuia Pachuau te inhnek tur zet chuan ngaihve a hlawh hle mai - a hun pawh ni khat chauhin a dang ta. LPS Promotions leh K & P Entertainment chuan May 14, 2022 (Inrinni) zan hian professional boxing, 'Clash of the Star' an buatsaih dawn a, he hunah hian G'nie leh Papuia te pawh ring chhungah an inhnek dawn a ni. 

'Clash of the Star' hi Dawrpui Multipurpose Centre-ah neih a ni dawn a, inbuatsaihna pawhin a vawrtawp a thleng chho mek. Mizo boxer te leh Manipur boxer te inhnek tur ai maha boruak nei lian zawk chu G'nie leh Papuia Pachuau inhnek tur hi a ni - tunge en chak lo awm ang? Beisei erawh tisang vak suh, boxing lama tawn hriat nei lo an ni a, chak zawk pawh an awm kher lo mai thei!

Chutih rual chuan ngawrh takin an training ve reng tih erawh hriat tel a tha a, entu mipui sang tam tak hmaah che chhe zawk nih an duh kher lo ang. Ring chhungah rapper nge actor ding chang zawk ang tih chu Inrinni zanah a chiang dawn e.