ZALEN, Nov. 6, 2024: Mizoram Football Association (MFA)-in tun hnaia match-fixing avanga player leh club-a tel mi thahnem tak a hrem thu kal zelah Goa Football Association (GFA) pawhin dam chhung atan Mizo player pali a hrem a, an zinga pahnih hi Goa Professional League-a khel lai an la ni.

Player hrem pangate hi Lalnunzama, Lalnunsiama, Lalawmpuia leh Flavius Lalruatkima te an ni a. Naga footballer, MFA-in dam chhung atana a hrem zinga mi, L. Lotha a tel bawk a, ani hi Lalnunzama nen hian MFA-in Mizoram Premier League 11-a match fixing avanga dam chhung atan a hremte kha an ni.

Lalnunzama hian MPL 11 hnuah Chanmari FC a chhuahsan a, Lalnunsiama hian Chawnpui FC a chhuahsan bawk a, an pahnih September 2, 2024 atanga May 31, 2025 thleng Vasco Sports Club-a khel tura inziak lutin Goan Professional League (GFL)-ah an khel mek a. An khelhna hi kum 1951-a din tawh niin Goan football league sang bera club upa ber a ni nghe nghe.

Lalnunzama-a hi MFA chuan Mizoram football-a match fixer-te hruai luta MPL season zawh taka match-fixing atana indawrnaa bultumtu ber nia a hriat a ni a. Defender Lalnunsiama pawh hi thla hmasa khan GFA Disciplinary Committee chuan season kal mekah rinhlelhawma a awm avangin insawi fiah turin a lo ko tawh bawk.

Player dang pathum – Lalawmpuia, Flavius-a leh Lotha te hi kum 2020 leh 2023 inkar khan Goan club-a lo khel tawh thin an ni a, tunah chuan Goan football-ah an tel tawh lo.

GFA-in dam chhunga football-a inhnamhnawih tawh lo tura a hremna hi MFA-in MPL-a match-fixing avanga club pathum – Sihphir Venghlun FC, FC Bethlehem leh Ramhlun Athletic FC bakah player leh club hotu sang (official) 24 a hremna kal zela a kalpui a ni.

“Goan football-ah hian kum eng emaw chen chu match-fixing hi a awm tawh tih chu kan hria a, tunah hian kan buaina hi hmeh mih tuma beih mek a ni,” tiin GFA President Caitano Fernandes chuan a sawi.

“MFA-in hremna a lekkawh tak angin kan hnena khel thin leh khel mekte lakah hremna kan lek ta a. Goa-a tuna awm leh tun hmaa lo khel tawh, Mizorama hrem tak zawng zawng chu dam chhung atan kan hrem a, hetah chuan an lo inkhel tawh lo vang. Match-fixing hi kan bei zel ang a, nakin zelah pawh hremna na tak zel kan pe ang,” a ti bawk.

Mizoram ang bawkin Goa hian AIFF-in dan a neiha Article 63.2 tlawhchhanin heng player-te hi a hrem a ni.

Tar lan tawh angin MPL 11 khelh zawh takah khan match-fixing a awm nia hriat niin MFA chuan police hnenah FIR a thehlut a, anni thil chhuina leh hmuh chhuah angin club, official leh player hrem an ni ta a ni.