- Upa Z.D.Vanlalliana, Kanan Veng, Aizawl December 25 chu kum dang ang lo takin Good Governance Day sorkarin hman a tum vangin ngaihdan phir leh chiai deuh hlekin kan hmang ta niin a lang. Political party-te leh NGO thenkhatte pawhin kan enghelhzia thu tarlan a awm nual a ni. MKHC meuh pawhin thuchuah an siam ve hial a, heng hi thil awm lo a ni hauh lo. Lal Heroda’n a hriata a manganpui, Kaisara ni ropuiah a lo theng ang khan, tun hun atan India ram Modi-a Ni ropuiah a lo thleng ve ta zel a ni mai e. Good Governance Day chungchanga thuthangvate kha buan ahmaa kan lo kherh lawk lutuk chiam kha thil tul ber a ni ang em aw? tih leh kan rinna derdepzia leh ngheh lohzia kan tarlanna a ni zawk mah em aw? a tih theih. India ram sorkar chu sakhaw tih bik nei lo, SECULAR SAWRKAR kan ni a. India sorkar pawhin Kristian-te hman ngei ngei tur tia min hman luihtir a tum thu hriat pawh a awm bawk hek lo. Tin, secular sorkar kan nih angin India ram pawhin engpawh lo puang se sakhaw hunpui nen a inrual a nih pawhin hlauhthawnna tur engmah awmin a lang lo. Lal Isua Krista kha ‘Revolutionary’ a ni lo’m ni? Khawvel leh Mizo Kristiante chuan, “Leilunga revolution ropui ber chu Russia rama kum 1917-a thil thleng te, China leh Vietnam rama mipui insuat buaih buaihna ang thil thlengte kha ni lovin kum 2000 liam taa Bethlehem Arsi eng hnuaia ran ina Lal Isua lo piang kha a ni zawk,” kan ti a ni. Mihring chuan a lamtang ni lo, a mihringpuite thisen chhuaha thah mang thak hnial lovin ralthuam, tharuma indona hmangin revolution an ti chhuak thin. Thuneihna inchuhin a chak chak ‘Might is Right, Survival of the Fittest, a ruh no no chhuakah,’ tiin lalna leh lalthutthleng luahin ro an rel thin. Pathian chuan thisen chhuaha khandaih leh tharum thawh lovin, vut aiah pangpar thi, nguina aiah hlimna hriak, a fapa thisen ngei chhuakin ama nun ngei chu a hlanin, “A KIN TA” a ti a, revolutionary hna chu a rawn thawk tlingtla ta a nih kha. A lama thinlung hawng apiangte chu luhchilhin a siam tha a, an tanna sual khur thim ata êngah a hruai chhuak a, chhandamna famkim hlu tak chu a pe a ni. Khawvel damlo damlehna chanchin tha hril zel tur leh hriamhrei leh tharum hmang lova khawvel la turin min zirtir zawk a ni. Chuvangin kha ni, Dec. 25 kan hman liam tak kha Good Governance Day mai ni lovin Best Governance Day tih pawh a phu hle a ni lawm ni? Lal Isua kha revolutionary a ni tih man fuh ila a tum leh duh dana khawvel hneh turin kan ngaihdan a inthlak ngei ang le! Rilru, thinlung leh nunah revolution chu a rawn intan ang. Kristian tam tak - Penticostal te, Evangilical mite ngei pawhin khawvel hi chu hawisan hmiah turah an ngai a, Lal Davida chuan ‘Leilung leh a chhunga thil awm zawng zawng hi Lalpa ta a ni’ a ti. Paula chuan ‘Khawvel emaw, nunna emaw, thihna emaw, thil awmsa emaw, thil lo la awm tur emaw, a zavaiin in ta vek a ni, nangni pawh Krista ta in ni a, Krista pawh chu Pathian ta a ni.’ a ti. (I Kor. 3:32.. etc). Engvangin nge roreltute thu kan awih ang? Rorelna leh roreltu an awm tur a ni tih leh mi dangin an thu kan awih tur a ni tih hi Pathian thu a ni a, Apostol-te zirtirna pawh a ni. ‘Mi tin an chunga roreltute thu thuin an awm tur a ni, roreltua awmte hi Pathian ruat an ni’ (Rom 13:1-7). Kan chhia leh tha hriatna pawh hian thu awih turin min zirtir. Sorkar insiam dan (form) entirnan: Democracy, Communism, Dictatorship tih ang hi Pathianin an ruat thu sawi a awm lo. Sorkar chi hrang hrang a thliar lo va, ringtu ngaihdanah a dah hek lo. Ringtuin roreltu thu a awihna tur chhan lian ber mai chu, Pathian chhiahhlawh a nih vang a ni. Paula leh Petera lehkhathawnte hi Nero-a rorel lai AD 54-68 inkar ziak nia ngaih a ni. Chutih lai chuan Nero-a chu a tha khawp a, nunrawn dan a thiam lo tih hial a ni. Tita hnena lehkhathawn hi Nero-an Rom khawpui a hal hnu, Kristianten nghaisakna rapthlak tak an tuar hnua ziak a ni a, chutichung chuan sorkar thu awih tura an zirtirna chu a la pangngai reng a ni. Ringtute chuan an Lalpa an hmangaih avanga roreltute thu an awih tur a ni tih Petera pawhin a uar hle (I Peter 2:13-17). Bible-ah hian roreltute thu awih duh lo tura inzirtirna a awm em? Good Governance Day hman chungchangah khan khi zawhna khi kan rilruah a lo chhuak ve awm e. Eng hunah emaw roreltute do a ngai ang em? (Tirh 5:29) ‘Mihring thu aiin Pathian thu kan zawm zawk tur a ni’ tiin Peteran a sawi. Do a tul a, a dik hun chu a awm tih a hriat. Chu chu engtikah nge ni ang? Roreltute thupek chuan Pathian kan biakna te, Pathian thupek kan zawmna tur a kalh a nih chuan chu chu kan do tul hun dik tak chu, a ni ang. Ram danin Pathian dan a kalh chuan Daniela pawhin a do. Lei sorkar thupek aia Pathian thupek kan thlan tul zawk hun lo thleng ta sela, chhanchhuah kan beisei kher tur a ni lo vang, tuar kan huam mai tur a ni. ‘Mi dangte pawh sawisakin an awm a, thlalerah te, tlangah te, pukah te, khuarkhurumahte an vak an vak thin a. Chungte tan chuan khawvel hi chenna tlak a ni lo’ (Heb 11:35-38) Ram dan (Civil law) leh Pathian thupek a inkalh chuan Pathian lamah ringtu chu atang tur a ni a, Civil law chu a do ang. Mahse, hriat reng tur leh hriat chian tul em em a awm ta. Pathian ringtu ka ni a, sorkarin ka chanvo mi chhuh avangin sorkar ka do tur a ni lo va. Sorkarin Pathian chanvo a chuhpui a nih erawh chuan sorkar chu ka do tur a ni tih hi. Lungawi lohna lantir leh nawrh huaihawtte hi sorkarin phal chin a nei thin. Ram danin a ruat loh leh thuneihna pawh a pek hleih lohten (Vigilantism/Vigilante) thil tha lo vengtu nia inchhala sakhaw rawngkai leh mahni hmasial leh lanmawi tum a, NGO`s invuah si thin ten, mihringpuite leh ram dan an sawisa thin hi a pawi takzet zet a ni. Mahni thu thua Dan lo lekkawh te, sorkar khap tih luih te, vantlang thil tih chhiatte erawh chu Pathian thuin a remtihna hmuh tur a awm lo. Sorkarin kan Pathian biakna a dal erawh chuan kan be lui ang a, min hrem chuan kan tuar ang a, min thah chuan kan thi mai ang. Mizo Kristian te mawhphurhna erawh chu chanchintha thehdarh te, nun thianghlima nun te, khua leh tui rinawm leh tangkai nih te, Ram roreltute tawngtaisak te hi a ni. Kristian sakhaw himna min sawi hmuhtu pawh an awm thin. Mahse himna hi kan zawn ber tur a ni lem lo. Isua neitu chu kan him a vangin. Kan Lalpan zawh tura min hrilh chu Kross kawng a ni. Good Governance Day mai ni lovin Best Governance Day (Krismas) kha, a Ni fang ang maia hmang ral lovin, Kutni leh hlimhlawp, ei bo bar chauha hmangral liam mai tur kan ni lo. Best Governance a nih avangin ni tin nunah Isua kan thinlung (Govern) awptu a nih zel a tul. Thu takah ding ila, sual do ila, a tul chuan rorelna te, tihlungngaih te, tihhlumte hial pawh huamin kan Lalpa lo kal lehna nghak ila, Khawvel ram zawng zawg hi kan Lalpa ram leh Krista lalna ram a nih theih nan thawk ila, Lal Isua tan khawvel lak kan tum ber lo ni zel rawh se.