Action camera lam ngainatute tan thu lawmawm a awm leh ta - September 15, Ningani khan GoPro Hero 11 Black series chu tlangzarh a ni ta rup mai. Company lam hian Hero 11 Black, Hero 11 Black Creator Edition leh Hero 11 Black Mini te an rawn tichhuak a, lei man hla tur tak tak vek a ni.    

India-ah bik chuan GoPro Hero 11 Black hi Rs. 51,500 vel a ni dawn a, Hero 11 Black Creator Edition hi a to deuh dawn a Rs. 71,500 vel a ni thung ang. Hero 11 Black Mini erawh a man a tlawm a, Rs. 41,500 bawr velin a lei theih dawn a ni. Hero 11 Black series te hi company online retail partner - Amazon, Flipkart leh Reliance Digital leh hmun dangahte chah theih a ni ang. 
Tun tuma an tihchhuah tharte hi a hma a mi te aiin a sensor a lianin a resolution pawh a sang zawk a, color depth, video stabilization leh a view pawh a hma aiin a wide zawk. An vai hian GP2 chip an hmang a, feature thar tha tak a neih pakhat chu automatic-a video  smartphone-a a thawn zung zung thei hi a ni bawk.

Hero 11 Black series te hi Hero10 Black te nen khan a lan dan a inang hlawm viau a, a display pawh a danglam teh chiam lo. A camera erawh an upgrade thung a, still hi 27 megapixel niin, video pawh 24.7 megapixel a ni. Video hi 5.3K (60fps) leh alternatively 4K (120fps) ten a lak theih a ni. 

Hero 11 Black series te hi tunlai thiamna sang tak hmanga thuam niin, Instagram leh TikTok vela hman atan pawh awlsam thei tura duan a ni. YouTuber te tan pawha hman nuam tak turin an duang a, a quality pawhin belhchian a dawl hle. HyperView a awm a, bike khalh paha video lak nante leh thil chi hrang hrang atan a tangkai hle dawn a ni.