Infiamna khawvelah hi chuan, puitling inelna karah kum naupang zawk talent nei tha tak tak te tel ve chang a awm fo thin. Hetiang talent nei tha bik hi tennis player zingah hian an tam bik emaw tih mai turin hmuh tur an awm fo thin a, tennis player-ah rau rau pawh hmeichhe lam hi an tam zual emaw tih mai tur a ni.

Puitling thankin tawh kara tleirawn tuai tir tana champion har tur zia chu kan ngaihruat thiam mai awm e. A bikin tennis khawvel-a trophy ngaihhlut ber Grand Slam hial chawi tur phei chuan thahrui leh thiamna piah lamah rilru huaisen leh paukhauhna nasa tak neih tel a ngai ngeiin a rinawm.  

Tun hnaiah Leylah Fernandez-i hnehin kum 18 mi Emma Raducanu chu US Open women's champion a rawn ni a, Raducanu boruak a reh hleithei rih lo. Tun tumah hian hmeichhe zinga Grand Slam champion nithei naupang zual 10 kan thlir ho dawn a ni. 

10. Svetlana Kuznetsova – 19 years and 76 days 
    Kum 1985, June ni 27 a piang Russian mi Svetlana Kuznetsova-i hian kum 2004 khan US Open women final-ah Elena Dementieva chu 6–3, 7–5-a hnehin a champion. A vanglai hun chhungin Grand Slam single final tum li lutin French Open leh US Open-ah a champion thei a, doubles-ah phei chuan tum 7 ngawt final a lut a, mahse Australian Open tum hnih chiah a champion thung. 

2007 khan a tawn san ber tum tawngin ranking No.2 a ni phak a, a career-ah title 18 lain prize money dollar million 25 chuang a vaw chhuak a ni. 

9. Hana Mandlikova – 18 years and 329 days
    Hrang hlui Hana Mandlikova hi Czechoslovakia tana khel thinin Grand Slam single title pali lain Wimbledon final-ah tum hnih a chak zo lo thung. 
    Single ranking No. 3 thleng phakin 1994 khan International Tennis Hall of Fame-ah lak luh a ni. 1980 khan Australian Wendy Turnbull chu 6–0, 7–5 a hnehin Australian Open title a chawi a ni.

8. Emma Raducanu – 18 years and 302 days
    US Open khelh zawh takah khan British tleirawl duhawm Raducanu chuan final-ah Leylah Fernandez chu 6-4, 6-3 a hnehin a champion. World ranking 150 ni chungin a khel a, a champion hnuah player 127 zet zuan khumin tunah chuan women’s ranking No. 23 a ni der tawh. Kum 44 hnua British hmeichhia champion leh thei hmasa ber a nih vangin hming thanna bakah sum leh paiin a um zui nasa hle. 

7. Steffi Graf – 17 years and 357 days
    Grand Slam 22 zet la thei leh kum 7 chhung zet hmeichhe ranking No. 1 nia tennis khawvel-a rorel thei Steffi Graf hian kum 18 a tlin hmain kha tih laia tennis lalnu tih hial khawp a player ropui, Martina Navratilova chu 1987 khan French Open-ah 6–4, 4–6, 8–6 a hnehin a champion. A career-ah title 107 lai a chawi thei a ni. 

6. Serena Williams – 17 years and 350 days
    American professional tennis player Serena  Williams hian Grand Slam single title 23 zet lain chawlhkar 319 chhung zet  WTA No. 1 a ni thei. Kum 1999 khan Serena hian US Open-ah a Grand Slam lakna hmasa ber tawngin Martina Hingis chu  6–3, 7–6 (7–4) a hnehin a champion. 

5. Arantxa Sanchez Vicario – 17 years and 174 days
    Spanish Vicario hian Grand Slam title 14 zet a lak zinga pahnih chiah hia single atanga a hlawh chhuah a ni. World No. 1 hlui Spainish hian a hun chhungin title 29 a la thei. 1989 khan French Open-ah champion lai Steffi Graf chu 7–6 (8–6), 3–6, 7–5 a hnehin a champion. 

4. Maria Sharapova – 17 years and 75 days
    Russian Sharapova hian 2004 khan Wimbledon tum hnih champion tawh Serena Williams chu 6–1, 6–4 a hnehin a champion. Grand Slam title tum 5 la theiin a career-ah title 36 zet a la tawh a ni.  

3. Tracy Austin – 16 years and 270 days
    World No. 1 hlui American Austin hi kum 16 mi lek a nihin US Open a chawi thei a, a hun chhungin Grand Slam title 3 lain a career-ah title 30 zet a chawi thei a ni. Kum 1979 khan US Open tum 4 zet champion tawh Chris Evert chu mak tak maiin 6–4, 6–3-a hnehin US Open trophy a chawi. 

2. Monica Seles – 16 years and 189 days
    Yugoslavia leh US tana khel thin Monia Seles hian French Open-ah 1990 khan champion lai Steffi Graf chu 7–6 (8–6), 6–4 a hnehin khawvel a barakhaih. Monica hian Grand Slam single titel 9 zet lain a career-ah title 53 zet a chawi thei.

1. Martina Hingis – 16 years and 117 days
    Swiss tleirawl hian kum 16 leh ni 117 mi lek a la nih lai January ni 25, 1997 khan tennis khawvel-a a hming dai ngai tawh lo turin Mary Pierce chu 6–2, 6–2 in Australian Open final-ah a hneh a, hmeichhe Grand Slam title chawi thei naupang ber a ni. A thiam leh hmelthat vanga lar Hingis hian Grand Slam title tum 5 a chawi a, French Open-ah tum hnih zet final a lut chungin trophy a hlawh chhuak zo lo a ni. A carrer-ah single title 43 leh double-ah 64 zet a chawi.