ZALEN December 22, 2025: Local Administration Department (LAD) chuan 15th Finance Commission atanga VC ten hna an thawhna tur Tied fund 2024-25 atangin cheng Vaibelchhe 22.80 chu Mizorama Village Council (VC) zawng zawng bank account-ah an thunsak leh chu All Mizoram VC Association te chuan Mizoram Sawrkar chungah lawmthu an sawi.

All Mizoram VC Association chuan, "Hemi chungchanga nasa taka hmalatu kan Chief Minister zahawm tak Pu Lalduhoma, Finance changtu ni bawk leh Prof. Lalnilawma, Minister Rural Development & Administration Department ten VC te min ngaihsak em em a, kumin Financial year (2025-26) tawp hma ngeiin VC-te puala fund lo kal leh tur 15th FC chu 2025-26 fund thlenga nawr chhuah tumin hma an lak thu kan hre leh zel te hi a thlamuan thlak kan ti em em a ni," an ti.

Kum 2024-2025 chhungin 15th FC Grant hi VC ten tum 4 an dawng hman dawn ta a, tun hnai kum 2 chhungin 15th FC Grant pawh Chief Minister Lalduhoma hmalakna te, LAD Minister hmasa C. Lalsawivunga; tuna a changtu Minister Prof. Lalnilawma te bakah LAD Directorate lama thawktute inpekna azarah 15th FC Grant an dawng tha hle a ni. 

Kum 2021-2022, Kum 2022-2023, 2023-2024 bakah 2024-2025 an hmu thei nghal hi Village Council te chuan ropui an ti a, Village Council te gaihsak tu Mizoram Sorkar chungah All Mizoram Village Council Association chuan lawmthu an sawi a ni.