Zirtawpni kalta khan Excise & Narcotics department chuan beihpui thlakin Aizawl khawpui chhunga grape wine man runpui an nei a. Grape wine pawh thahnem tak man a niin hei hian inhnialna a chawkchhuak nghal a, ngaihdan inpersan tak awmin sawrkar thiltih thlawp leh thlawp lo an awm a ni.

MNF sawrkar hmasa kha Mizorama grape chin bultantu leh chawinungtu a tih theih hial ang a, sawrkarin grape a tuipui avangin Hnahlan leh Champhai winery atangin grape tui thahnem tak hralh a ni a. Kuthnathawktu tam takin dinchhuahphah nan an hmang bawk a ni. Mahse Congress sawrkar a lo pian hnuah zu khapna dan chu ennawn a niin dan hnuaiah zawrh a ni ta hial a. Heta tang hian grape tui chu a hnawng tan ta a, chhungkaw tam tak eizawnna chu a lo tawp ta a. Grape hralhna a awm miau loh avangin chhungkaw tam tak chuan an grape huan te chu thlai dang chinna atan an hmang ta a ni.

Mahse, kum 2018---a MNF kaihhruai sawrkar a lo din leh khan beiseina sang tak an nei a. Chhungkaw tam takin an grape huante chei thar lehin a hlawkna pawh an hmu chho tan leh mek a. Mahse hetia grape tuite man a nih zel dawn chuan kuthnathawktute hma lam hun tur hian ngaihtuah a tithui hle a, an phurna pawh hian eng chen nge a daihah tih chu zawhna chhan har tak a ni ta.

Mizote hi thuawih tak leh taima tak kan ni a. Ram hruaitu ten min kawhhmuh chuan eng thlai pawh hi kan ching mai a. Chumai bakah a hlawk dawn nia kan hriat phawt chuan kan thatchhe ngai lo a ni. Grape ngei pawh hi an hlawkpui avangin khawchhak tlangdungah chuan an taima lo thei lo niin an sawi. Chutih rual erawh chuan kan sawrkar kal tawh atanga vawiin thleng hian kan thlaithar hralhna kan la zawng hmu thei lo hi chu kan inenfiah a ngai hle. Hun kaltawh han chhui kirin thlaithar kan ngah deuh chuan kan buai zel em ni aw a tih theih a, tunlai pawhin dawnfawh hralhnaah kan buai leh mek a nih hi!

Grape chungchangah hian inpuhtawnna a thleng chho mek a, sawrkar lam chuan dan phal loh a ni tiin tunah hian an man a. Kuthnathawkte thlai thar a man nia ngaiin mi tam tak an thinrim a ni. Chutih rual chuan sawrkar hi grape zuarte hian man lo thei lovin an siam em tih pawh hi chhut ngun a ngai khawp mai. Grape zuartu thenkhat hian an grape zawrh hi hmang tangkaiin hemi phenah hian beer leh khawchhak lam zu te an zuar tel niin an sawi a, hei hi tak tak anih chuan sawrkar hi hma la lo thei lovah kan siam a ni thei ang.

Sawrkar hian a khua leh tui te harsatna hi a enliam mai mai tur a ni lo a, tunah pawh Hnahlan leh Champhai chhehvelah grape chinga eizawng chhungkaw thahnem tak an awm a, an harsatna hi a chinfel dan a dappui ngei tur a ni. Tun dinhmuna kan mamawh ber chu Wine Rules fel tak neih hi a ni a, Mizoram chhungah grape tui hi hralh a rem lo a nih pawh state pawna an hralh dan tur tal hi a ngaihtuahpui a ngai a ni.