Aizawl: Horticulture Department chhinchhiah danin nikum 2014 chhung khan Champhai district ah Grape quintals 112981 thar a ni a, kum hmasa 2013 a thar 106196 aiin quintals 6785 in a tam zawk.

Nikuma Grape tharchhuah quintals 112981 atang hian quintals 13000 chu Champhai Winery ah um a ni a, Hnahlan Winery ah quintals 1800 chuang deuh um a ni bawk a. Nikum chhung vek khan Champhai leh Hnahlan Winery hian Grape tui (wine) litres 139266 an siamchhuak bawk. Kumin ah hian Horticulture department ten grape that theihna tura bawlhlo engemaw zat an pek avangin kum hmasa lam ai khan thar tam zawk tura beisei a ni.

Hetih lai hian Mizoram ah zu zawrh anih tak avangin kumdang aiin Grape tui 'Zawlaidi' leh Zo Wine' te chu hralh a har hle a, Winery atanga siamchhuah te pawh tlemte chauh hralh anih avangin Winery thawktute lu a hai hle a. Sawrkarin Winery atangin zu chikhat 'Brandy' siamchhuah phal se an duh hle tih kan palai an hrilh.