Aizawl: Champhai Horticulture thawktute chuan grape thlum chi kuthnathawk te tan chin theih a ni em tih an enchhin mek. 

Champhai leh a chhehvela Horticulture department hmalakna ena kal Aizawl chanchinbumite hnenah District Horticulture Officer, Champhai B. Lalzarzova chuan he thu hi sawiin, "Grape mu awm lo, thlum si table fruit leh wine a siam theih hi kan enchhin mek a. Green house ah chuan a tha hle tih kan finfiah tawh a, kuminah hian Chhungte ah farmer te kan chin tan tir dawn a. Hei hi a hlawhtlin chuan farmer ten an hlawkpui hle dawn a ni," a ti.

Horticulture thawktute sawi danin nikum khan Hnahlan khua chuan grape quintals 1500 tharin heta tanga sum an hmuh zat chu Rs. 90,00,000 a ni a. Champhai leh a chhehvel khua ten 1244.98 quintals tharin heta tanga sum an hmuh chu Rs. 68,69,899.80 a tling a ni.

Champhai DHO thawktute sawi danin nikum chhung khan Champhai district ah tomato qtl 2732 thar a niin Rs. 95,19,000 leichhuah a ni a. Off season cabage (zikhlum) 8118 qtls tharin heta tang hian Rs. 2,71,93,000 hmuh anih bakah dawnfawh atangin Rs. 14,72,250 hmuh a ni bawk.