Aizawl July 15, 2022: Champhai-a Grape Winery tlawh Lalduhoma, MLA chuan Grape Wine chu Food Safety and Standard Authority of India in food item-ah a puan a nih thu a sawi a, Grape Growers Society hruaitute nen inkawmhona an neih ah grape wine nuai 20 chuang man an man sak hnua thi Lalhriatpuii ralna tur thawhkhawm turin an inchah tih a sawi..

Duhoma chuan, “Tun hnaiah grape wine zuartu Lalhriatpuii chu nuai 20 chuang man lai a grape wine zawrh man sak a ni a, chumi avang chuan rilru leh taksaah harsatna te tawkin a nunna hial a lo chân hi a pawi kan ti tak meuh meuh a, social media-ah te a ralna tur veh bur te khawnin buatsaih sak a ni a, heng hi keini chuan kan support a, kan neih ang ang te i thawh ang u tiin kan in chah duh a ni,” a ti bawk.

ZPM Leader Lalduhoma chuan Champhai a Grape Winery-a tlawh naah, “Kan ram chhunga thar ngei grape kan ram chhûngah a sawngbawlna mumal tak kan nei hi kan lawm hle a. Chutih laia harsatna in tawk mai hi pawi kan tiin hriatthiam har kan ti a; Food Safety and Standard Authority of India in grape wine hi food item-ah a puang a ni. Winery pawh hi food processing unit a ngaih a ni a, he in winery pawh hi zu siamna factory a ni lo va, food proceesing unit zinga mi a ni,” a ti.

Theihtawpa an thlavang hauh chu an tih theih tawk a nih rih thu sawiin, Duhoma chuan, “Mizoram chhung mai ni lo, ram pawn thlenga thawnchhuah dan turte ngaihtuahin hma nasa takin in la mek tih pawh kan hria a. Tuna hetiang dinhmun in thleng ta mai hi pawi kan ti em em a, theihtawpa lo tlangau pui che u hi tun dinhmunah chuan kan tih theih tawk a ni hrih a, tuna kan thlen chinah hi chuan lungawina a awm ta lo a, vendor te tan pawh zawrh tur lak chhuah a phurawm ta lo va, harsatna lian tak in tawk mek a nih hi,” a ti a.