ZALEN October 18, 2025: UNDP hnuaia 'Green Climate Fund' chu Mizoram-in a hman tangkai theih nan Dr. Dipak Das Gupta, Climate Scientist, Ministry of Finance, Govt. of India a Principal Economic Adviser ni thin USA a cheng mek leh Niti Ayog Member lo ni tawh Joy Chakravarty chu I&PR Minsiter B. Lalchhanzova chuan vawiin khan Kolkata Mizoram House, Salt Lake-ah a kawm.

Dr. Dipak Das Gupta chuan India hmarchhakah sik leh sa inthlak chuan nghawng a neih len thu sawiin, hemi kawnga hmala tura Mizoram sawrkarin hma a la ṭan chu lawmawm a tih thu sawiin B. Lalchhanzova hnenah Mizoram tana climate change mitigation lama priority sector identify vat nise a pawimawh thu a hrilh. Thingtlang lo neih hlawk tawh lo leh sik leh sa inthlak avanga eizawnna danglam mek te, sawhthing chin eizawnna te leh Mizoram state chungchang thil hrang hrang an sawiho.

B. Lalchhanzova chuan August 3, 2025 khan Aizawl-ah sawihona neih a nih thu leh August ni 1, 2025 khan Bhubaneshwar-ah Green Climate Fund (GCF) Regional workshop-a a tel thu sawiin, hetah hian thil pawimawh tam tak an zir thu te, GCF chungchangah India hmarchhak state-te chuan tanlak kan la ngaih nasat thu a sawi bawk. January, 2026-ah 'Regional Workshop for North East' chu Mizorama neih a nih theih nan MoEFF leh UNDP lam te nen an indawr mek zel tih Minister chuan a sawi bawk.

Inkawmhonaah hian Climate Finance hnuaia Mizoram tana hmalak theihna kawngte chak zawka dap chhoh dan tur zawn a tul zia sawi a ni a. Hemi ti chak tur hian Mizoram sawrkara department hrang hrang te bakah Financial Institutions te leh zirna in te, khawtlang te tanrual a tul thu Dr. Dasgupta hian a sawi bawk a ni.

Climate Finance chungchangah hian Mizoram Chief Minister-in B. Lalchhanzova, I&PR Minister chu hma la tura a ruat angin hma lak chhoh niin; EF&CC Minister Lalthansanga leh RD&A Minister Prof. Lalnilawma te nen Climate Finance hi an buaipui mek a ni.