Tunkar tharah hian kum 20 lai kum tina hman thin Green Mizoram Day hman a ni dawn a, Aizawl leh a chheh velah phun khah a nih tawh avangin Hmuifang a hmang turinForest Department te’n an rawt a. Chief Minister chairman a nihna Green Mizoram State Level Committee chuan a pawmpui tawh a. Hemi ni hi restricted holiday niin sawrkar hnathawk te chu kum dang ang bawka kal tura beisei an ni. Aizawl leh a chheh velah a hlawma thingphunna hmun tur awm loh avanga hmun danga nghah ngai a ni hial hi a lawmawm hle a, hmalatu Forest Department hnathawkte thawh hah rah hi a duhawm thlawt a ni. An hmalakna hi tu tan pawh entawntlak a ni a, Aizawl leh a chhehvel chauh niloin district capital leh khaw hrang hrangah te pawh tan han la sauh sauh sela, thing hringa innghat ramsa leh nungcha dangte tan dam khaw chhuahna a ni dawn a . Chutiang bawkin kan ram chhunga mihring chengte pawhin boruak thianghlim zawk an hip thei anga, mi a ti hrisel piah lamah nunphung zawng zawng a tha zawnga inthlak tirtu a ni hial thei awm e. Kan chenna khawvel hi ram ngaw tel loa awm thei lo a ni a, nunna atana pawimawh ber boruak thianghlim a pek chhuah vang a ni. Hmasawnna avangin hmun mamawhna a sang zela, bungraw dang siam nan thing leh mau te kitin ram tam takin buaina an tawh phah fo a. Hmun thenkhatah chuan company te chu ram an tih chereu aia zau thingphun tir an ni hial tawh a, chumi pawh chu nise a puitlin hun nghah chhung a reia a hma ang a pha thei tawh lo. Green Mizoram Day hian tum a nei a, ramngaw bit zawk siam leh thing atanga siam bungrua a theih ang anga hman loh te chu a thil tum zinga pawimawh tak a ni. Mihring bawkin hmun hring nuam a mamawh a, mihring thoin a mamawh vek chu a mamawh dang phuhruk nan a ti chhe zel bawk a ni. Kan chenna humhalh inzirtir hian tawp in tai a nei thei loa, thangthar te hnena hlan chhawn zel tur a ni a. Mipui lamin an mawhphurhna hlen turin rilru siam zel sela; lei (earth) a cheng kan nih avangin mitinin mawh an phur a, a ti tur bik awm anga ngaihna hi paih a ngai hle mai. Green Mizoram Day hmang tur hian sawrkar hnathawk te an fehchhuak mawh hle a, kal awm ngawih ngawiha ngaih hmuh tur an awm lo fo hi a pawi hle a. Sawrkarin kal tura a tih vang chauh nilo in, kan cheina lei humhalh chu mitin mawh a ni tih hrechungin kumin chu mitinin engnge maw tal tih tum theuh ila. Thingphun hlawhtlinna chu tunah hian khawpuiin a seng mek a, nungcha tam tak hram ri hriat tur awm tawh mang lo kha tunah chuan an chiar leh noh noh tan tawh a; a ri a mawiin ngaihthlak a nuam hle mai. A mala tlemte anga lang ni mahse a huhoa khaikhawm a nihin a hlawhtlinna a hmuh theih a. Kan dam khawchhuah nan thing phun ang u!