Hmarchhak kil khawr Mizoram atang pawha kan lo en nasat em em 'Green Rose' series-a a changtunu Lee Da-hae chuan pasal a nei dawn e. A pasal tur hi kum riat lai a lo zui tawh K-pop star Se7en a ni a, May 6 khian an innei dawn a ni. 

Lee Da-hae hi a larna a rei tawh ang reng viau a, tunah chuan kum 38 mi lai a lo ni ve der tawh mai. A pasal tur K-pop singer Se7en pawh hi kum 38 mi tho a ni a, Lee Da-hae hi a thlain a upa zawk thung. Lee Da-hae hi April 19, 1984 khan Seoul, South Korea-ah a piang a, Se7en erawh November 9, 1984 ah a piang thung - an pianna hmun erawh South Korea khawpui lar Seoul ve ve a ni. 

Se7en hi a hming tak chu Choi Dong-wook a ni a, artist hriat hlawh tak a ni. An inneih tur thu hi Istagram kaltlangin an tarlang a, fans lam pawh an phur tawh hle. IG-ah hian an inneih thlalak ni awm tak an pholang a, thenkhat chuan an innei tawh zawk emaw an tihman hial. Mahse South Korea-ah chuan hei hi an tih dan thin pakhat a ni a, an inneih hma hian shooting an nei lawk thin a, invitation leh social media vela thehdarh atan an hmang thin a ni.

Lee Da-hae leh Se7en te hi kum 2015 atang khan an inzui tan a, vantlang hriata an puanzar erawh kum 2016 khan a ni thung. Milar an nih avangin an chanchin hian ngaihven a hlawh thin viau a, an innei tur boruak pawh hian social media lam a luah hneh hle.