Puducherry-a 48th Sub Junior National Basketball Championship khelh mekah champion lai, Mizoram chuan group stage-ah an tumpui hneh vekin awlsam takin final an lut a, an tan pre-quarterfinal pawh khelh hah a ngai dawn lo.

Ningania inelna tanah hian Mizoram hi Group A-ah awmin Maharashtra, Uttar Pradesh leh Kerala a awmpui a, a tirah Karnataka chu tel turin inziak lut mah se team an tir lo.

Mizo rawlthar rual hian an khelh hmasak berah 64-13 zetin Maharashtra an sawp nghal a. Uttar Pradesh hmachhawn lehin 74-63-a hneh lehin an khelh hnuhnung berah Inrinni chawhma khan Kerala chu 80-23-in an sawp leh bawk a, khelh thumah an chak vek.

Mizoram hi group stage paltlanga knock-out round lut zingah pawh a titha ber an nih avangin pre-quarterfinal an khelh hah ngai lovin quarterfinal lut sain an tum leh tur an lo nghak dawn a, Pathianniah awlin Thawhtanniah an khel leh ang.

Quarterfinal-a an hmachhawn leh tur pawh hi tute nge tih sawi lawk theih a ni lo va, Pathiannia inkhelte result azirin tu ber nge ni dawn tih a la hriat chauh dawn a ni.

Harsa lo taka quarterfinal an luh chungchangah hian head coach Marc Lalthlamuana Sailo chuan player mal fak bik tur pawh an awm lo niin a sawi a; Samuel Vanlalpeka, Emmanuel Lalpekhlua leh Stephen C. Lalhruaitluanga te chu mi mala che tha deuh anga sawi theih ni mah se team pum thawhhona leh tan rualna a tha a, theihtawp an chhuah tlang tih a sawi.

Puducherry-a inelna khelh mekah hian a tir atangin Mizoram player 12 zingah damsam lo an awm nghal nual a. Maharashtra an hmachhawn tum phei kha chuan dan pangngaia player 10 tal inkhel thei awm turah pariat chauh an awm hial a; mahse, harsatna lian lutuk an nei zui tawh rih lo.

Sub Junior National Basketball Championship hi Basketball Federation of India (BFI)-in state hrang hranga kum 14 hnuai lam, hmeichhia leh mipa inelna atana a buatsaih thin a ni a. Kuminah hian Puducherry-in thlengin Mizoram hian mipa team a tir a. Mipaah team 27 inlanin hmeichhiaah 25 an inlan thung.

MIZORAM TEAM:
Player:
1. Samuel Vanlalpeka, Kulikawn West
2. B Lalruattluanga, Tuikual South
3. Emmanuel Lalpekhlua, Republic Veng
4. Stephen C Lalhruaitluanga, Aizawl Venglai
5. Jacob C Vanlalruatdika, Khatla South
6. Ronie Vanlalawmpuia, Bungkawn
7. Joel Lalbiakhlua, Khatla South
8. K Lalsangzela, Zarkawt
9. PC Lalruatfela, Dawrpui Vengthar
10. Reagan Zohmingsanga, Mission Veng
11. Lalrinchhana, Kulikawn West
12. C Lalfakzuala, ITI Veng

Manager: Raymond Lalengkima, Khatla South
Head coach: Marc Lalthlamuana Sailo, Zarkawt
Assistant coach: Z.D Denghmingliana, Kanan veng