Aizawl: Planning department chuan Mizoram Gross State Domestic Product leh Per Capita Income chu national level aiin a sang zawk niin an sawi. Planning department-in thuchhuah an siamah state sum leh pai thawhchuah Gross State Domestic Product chu Central Statistics Office, Ministry of Statistics & Programme Implementation-in a chhut dan tur kalphung a duan ang thlapin India rama state zawng zawngin methodology ang khat hmangin an chhut thin a. Kum tin state chhunga line department report leh survey hrang hrang result atangte-in State level-ah chhut a ni a. Central lamin line Ministries-te atanga data hmangin an chhut bawk a. Heng data set hnihte hi ennawn a, khaikhin tur leh a inmil lohnate zir chiang turin kum tin May-June thla velah State leh Ministry Official te’n reconciliation meeting an nei thin a. He meeting-in a rel leh thutluknate chu uluk taka bawhzuiin financial year khat atana ‘final comparable estimate’ tihchhuah thin a ni tiin an sawi. GSDP hi ram/State than leh than loh enna ber a nih avang leh Central in State te grants leh incentives a pek thin te kaihruaitu ber atana hman a nih thin avanginState-ten anmahni thu-a GSDP an lo tihchhuah ngawt hi phal a ni lo a. National Account Division of Central Statistics Office-in kumtin final turin New Delhi-ah kar khatchhung State sawrkar-a a chhut chhuaktute ko khawmin Account Reconciliation an neihpui ziah thin a, data te uluk taka an enchian hnua a rintlak ngei a ni tih an pawmpuihnuah state-in an GSDP figure an tichhuak thei chauh thin niin an sawi bawk. Planning department chuan mi thenkhatin GSDP chhut nana Central sawrkarin State-a sum a pek thinte an nih ang anga GSDP chhutnaa thun luh anga an ngai chu a dik lo tih sawiin Mizoram GSDP growth rate chu national average aiin a sang chho char char a. Kum 2014-15 atang phei hi chuan a sang leh zual a, hei hian state economy than chhoh nasatzia a tilang chiang hle a ni, an ti a. Niti Aayog-in July 10, 2017-a Compendium of Presentations a tihchhuah pawh Gujarat, Jharkhand, Tripura leh Mizoram chu India ram state thang nasa ber pali zingah a tel niin an sawi. Planning department chuan chawhruala mi pakhatin kum khata a sum leh pai thawhchuah zat per capita income-ah pawh Mizoram chu national average aiin a sang niin an sawi a. “Kum 2011-12 atanga kum 2013-14 thleng kha chuan Per Capita Income-ah All India average kan phak ngai lo va, kum 2014-15 atang chuan National Average aiin a sang chho a, hei hian economy than chhoh nasatzia a tilang chiang hle a, kan purchasing power leh kan standard of living hian kan Per Capita Income than nasatzia hi a pholang chiang hle,” an ti bawk.&&&&