ZALEN, June 14, 2026: Mizoram sawrkar, Commissioner of State Tax hnuaiah sumdawng mi 9,443 GST-ah inziak lut an awm a. Kum hmasa aiin nikumah GST atanga sum hmuh a tlem zawk a, chhiah chi hrang hrang hmuh erawh kum hmasa lam aiin a tam zawk thung.

Goods & Services Tax (GST) atang hian kum 2024-25 chhung khan Mizoram sawrkar chuan Rs. 937,76,93,760 a hmu a, kum kalta 2025-26 khan Rs. 931,62,76,931 hmu lehin kum hmasa aia nikuma sum hmuh tlemna zat hi Rs. 6,14,16,829 a tling a ni.

ZALEN RTI zawhna chhangin Commissioner of State Tax SPIO chuan Mizorama GST pe tam zual sumdawng pathumte chu Dhariwal Buildtech Limited, Brn Infrastructures Private Limited leh Pawan Hans Limited te an ni tih a tar lang a. Mizorama sumdawngten GST an pek that leh that loh zawhna chhangin a tlangpuiin an pe tha hle. 

Department data thar ber (April, 2026 return filing) atanga chhutin Mizoramah hian sumdawng inziak lut (total taxpayer) 9,443 an awm mek a. Heng zinga mi 6,741 hian GSTR-3B return an file a. Heti hian sumdawng inziak lut atanga 71.38% velin GST hi an pe (return an file) tih a sawi bawk.

GST pe tha lo emaw, pe duh lo hrem an awm leh awm loh zawhna chhangin hrem an la awm lo a; amaherawhchu, taxpayer (sumdawng/contractor/ supplier etc) zingah tax an pek tur zat pe lo emaw, pe dik lo emaw an awm em tih hi engtik lai pawha vil reng a ni a, a theih ang ang zawn chhuah niin dik taka pek dan tur kawhhmuh thin an ni tih a sawi bawk.

Taxation department hian GST bikah hian kum hmasa phak lo mah se chhiah chi hrang hrang an khawnah erawh nikum aiin an hmu tam zawk a. ZALEN-in Commissioner of State Tax HK Lalhawngliana a kawmnaah website-a an tar lan aiin nikum an sum hmuh chu a tam zawk tih a sawi. 

Commissioner of State Tax HK Lalhawngliana chuan, “Kan departmentin sawrkar kum tawp (March, 2026)-a kan sum khawn/ hmuh kan chhut chu Rs. 12,78,55,13,765 niin kan ngai a. Mahse, AG lamte nen reconciliation kan tih hnuah hei aia tam Rs. 12,81,22,96,600 a lo ni zawk a, department website-a tar lan aia nikum kan sum hmuh tam zawkna hi Rs. 2,67,82,835 a ni,” a ti. 

Commissioner of State Tax chuan hma thar an lak hnuah an sum khawn chhuah pawh a pung tih sawiin, “Sawrkar min phalsak angin department structuring kan ti a. Aizawl zone li awm thin kha zone hnih, North leh South-ah siam a ni a, hei bakah policy & law, intelligence, audit, recovery leh enforcement wing te siam tharin theihtawpin hna kan thawk a. Hei vang hian kan sum khawn chhuah pawh a pun phah a ni,” a ti bawk.