Aizawl: India ram pumah Goods & Services Tax (GST) hman anih hnuah Mizoram atangin vaibelchhe 22 hmuh a ni tawh a, GST hman hnu hian tax hmuh tur zat chuan beisei a pha lo nia thudawn a ni. Ministry of Finance hnuaia Department of Revenue (State Tax) thawktuten Zalen an hrilh danin GST hnuaiah hian hriat theih chinah Mizoram atang bikin central-in Rs. 3,39,59,221, state-in Rs. 4,58,52,601, IGST-ah Rs. 14,14,10,247 leh Cess-ah Rs. 73,64,928, a vaiin Rs. 22,85,86,997 hmuh a ni tawh a ni. GST dan ang chuan sum hmuh zawng zawng hi a inzat (50:50)-in central leh state chuan an insem dawn a ni. Tun dinhmunah GST hnuaiah hian sumdawng inziak lut state hnuaiah 3122 leh centre hnuaiah 1349, a vaiin 4471 an awm a ni. Taxation department thawktute chuan GST dan hman hnuah tax dang atangin sum hmuh pung mah se GST-ah chuan beisei a pha lo tih Zalen an hrilh a. Beisei a phak loh chhan zingah thil thar a nih vanga mipuiin an la hriat thiam loh vang te, sumdawngten an la hman thiam tawkloh vang leh VAT hnuaia chhiah lo pe lawk an tam vang te nia an hriat thu an sawi a. State dangte pawhin an beisei an phak lo vek niin an sawi bawk. Department of Revenue (State Tax) thawktute pawhin GST hnuaia sum hmuh a tlem chhan chu a tira bungraw leinaah chhiah pek a nih tawh avangin VAT ai chuan a tlem zawk a ngai niin an sawi bawk.