ZALEN November 30, 2025: India ram pumah September 22, 2025 atanga Goods & Services Tax dan thar (GST 2.0) hman a nih hnuah Mizoram sum hmuh chu a pung.

ZALEN-in Commissioner of State Tax H K Lalhawngliana a kawmnaah GST atanga sum hmuh hi a pun thu a sawi a. “Mi thiamte chuan GST thar hman tan atanga kum thum chhung vel chu sawrkar sum hmuh hi tlahniam tura ngaih a nih laiin Mizoramah erawh kan sum hmuh hi a pung zawk a. GST atang hian August, 2025 khan vbc 63.79 kan hmu a, GST hman hnu, September, 2025-ah vbc 71.51 leh October, 2025-ah vbc 77.70 kan hmu a ni,” a ti.

Mizoram sawrkar sum hmuh a pun chhan chu department-in nasa taka tan an lak vang a ni tih sawiin HK Lalhawngliana chuan, “Theihtawp chhuahin department-in tan kan la a. Quick Response Team pahnih siamin hma kan la char char a, GST pe lote dap chhuakin penalty kan chawitir pawh nuai 10 vel kan hmu tawh a. Kan sum hmuh a tlakhniam loh nan nasa takin kan bei a ni,” a ti.

Sawrkarin chhiah a lak thin tihniam mah se GST atanga sum hmuh chu a tam zel a beiseiawm tih sawi bawkin Commissioner of State Tax H K Lalhawngliana chuan, “GST a tlakhniam vang hian thil man a tlahniam a, chuvang chuan mi nawlpuiin a hmaa kan lei ngam loh eng emaw zat kan lei ngam phah a, bungraw hralh a tam chuan GST a pung ve zel a. Hei vang hian tax tla duai tura ngaih pawh a tlahniam lo ve thei a ni,” a ti bawk.

Chhinchhiah danin Mizoram chhungah GST-a inziak lut mi 10,000 vel an awm a, GST atanga sum lutte hi sawrkar laipui leh state sawrkar chuan a zat ve (50:50)-in an insem thin a ni.