ZALEN July 3, 2026: Mizoram Sawrkar hnuaia Taxation Department chuan thuchhuah siamin tun hnaia Goods and Services Tax (GST) registration dilna thenkhatte chu thu dik tawklo leh document lem hmanga dil an ni tih a hmuhchhuak a.

Taxation Department-in heng dilna te hi a enfiah hnuah hetianga diklo taka registration diltu thenkhatte chu an sumdawnna hmun anga an sawiah hmuh tur an awm lova, an dilnaa document an thehluhte pawh finfiah theih a ni lo tih hmuhchhuah a ni. Dilna thenkhatah phei chuan in/dawr luah tur neitute hriat miah lohvin an hming hmangin dilna an lo thehlut thin tih hmuh a ni bawk.

Heng thil thlengte hi Department officer-ten risk-based scrutiny, data analysis leh physical verification an kalpui mek atanga hmuhchhuah a ni a. Mizoram Goods and Services Tax Act, 2017 dan in a sawi angin hmalak dan tur ngaihtuah mek a ni.

Taxation Department chuan mipuite, in neitute leh sumdawnna kalpuitute chu an identity document, an address, an mobile number, an e-mail address leh an personal information dangte GST registration atan emaw, sumdawnna dang atan emaw hmang tura dil an nih pawhin lo hmantir phal lo turin mipuite a ngen a. In neitute pawh GST registration atana hman tur consent letter, rent agreement leh document dang mamawh diltute chu enfiah hmasa turin a ngen bawk.

Mi tu pawhin identity document hman sualna, address hman sualna emaw, GST registration chungchang a thil rinhlelhawm emaw a hria a nih chuan Taxation Department hnenah hriattir theih reng a ni.