Manchester City boss Pep Guardiola chuan a hma hun lo thleng tura thu tlukna a siam tur reng rengah inhawng leh hawihawm taka thu tlukna a siam thin tur thu a sawi. 

    Guardiola hian City-ah 2022-23 thleng chauh contract a nei tawh a, amaherawhchu, City coach kum 51 mi hian Etihad Stadium chhuahsan lam leh khawi club nge a zawm ang tih lam a la ngaihtuah ngai loh thu a sawi chhuak thung. 

    Guardiola chuan,"He club hian ka mamawh engkim min pe a, ka phatsan thei lo mai bakah an tana thil thalo tur tih ka duh ngai lovang. Chutianga mahni hmasial taka chet chu ka mizia a nilo bakah ka tan a mawi lo. Heta rawn kal tur hian thu tlukna kan siam ho a, tin ka contract pawh tum hnih lai kan pawtsei tawh bawk. 

    “Tunah chuan club hian min la mamawh zel dawn em tihah ka innghat a, keimah lam chu he club-ah hian ka la tui rih e," a ti. Sawi belhin,"Contract neih lai renga mahni hma hun tur thlir a, ngaihtuahna seng vak vak thin mi ka ni lova, hma hun thlir lawk vak vak thei pawh ka ni lo, ka hma hun hi kan result-ah a innghat tlat a ni," a ti.

    Guardiola hnuaiah hian Manchester City hian kum 6 chhunga Premier League title 4-na tur an beisei leh mek a. Man City hi Carabao Cup leh FA Cup-ah tum 4 zet a champion pui tawh a ni.