Manchester City manager Pep Guardiola-a’n Barcelona a enkawl chhunga a player hman thiam ber kha thlansak tur ni ta ila, kan thlan chhuah a inang lo fur ang a. Hetih rual hian Lionel Messi-a thlangtu an tam fuin a rinawm.

Ni e, kum 2008 atanga 2012 chhunga La Blaugrana a enkawl chhung khan Guardiola hian nomawi 12 zet lakpuiin an manager neih tawha hlawhtling ber a ni a. Player hmuhnawm bik - Messi bakah Xavi, Andres Iniesta, David Villa leh Sergio Busquets te rual kha an ni a, a hman thiam bik player thlan a har khawp ang.

Kum 2011 Champions League final-a Wembley-a Manchester United 3-1 a ‘an sawp’ tum phei kha chuan Red Devils boss Sir Alex Ferguson khan, “Ka hmachhawn tawh team-ah an la tha ber,” ti hialin a sawi a nih kha.

Nilaini khan Busquets chuan season tawpah Nou Camp a chhuahsan tur thu a puang ve ta a, tunah chuan Guardiola kaihhruaia 2011 European champion ‘Barca team tha bik’ an tih chu an liam zo dawn ta a ni.

Mahse, tunah hian Catalan club hian an fapa chuam, Messi-a koh kirna hun remchang an nei mek a; mahse, kum 2021-a an chhuahtir chhan ang tho, sum lamah harsatna an nei a, beisei erawh a sang lo.

Saudi Pro League-a Al Hilal pawhin an beisei ve nia sawi, Argentina captain hian nipuiah Paris St-German a chhuahsan dawn tih a chiang thawkhat tawh a, a zawm tur hi season a tawp hma chu engmah tihfel a awm lo tih a pa, a agent ni bawk, Jorge chuan a lo sawi tawh.

Hetiang boruak karah hian amah lo enkawla hlawhtlinna tam tak lo chanpui tawhtu, City boss a lo tawng chhuak a, sum leh pai avanga lak luh ‘theih loh’ anga an sawi chu Messi hian ‘theih’ tia chantirin Nou Camp a pan leh ngei a rin thu a sawi.

ESPN Argentina-in an kawmnaah Guardiola hian amah pawh a lo khelh tawhna, Barcelona fan a nih thu a sawi a,  “Camp Nou-ah ngei engtik niah emaw chuan a phu ang ngeia kan mangtha ka beisei tlat a. Player ropui ber a ni,” tiin Ballon d’Or vawi sarih dawng tawh Messi a fak rualin Catalan a pan leh ngei a rin thu a sawi.

“Kum 2021 (Messi-a a chhuah lai) ang khan thil hi a thlen ka ring lo va. President Joan Laporta pawhin Leo hi a ngaina tih ka hria a, a chhuah hnuah khan thlahna ropui tak siamsak a phu thu a sawi thin,” a ti bawk.

Messi-a hi Spanish coach kaihhruaina hnuaiah hian ropui takin a lo khel tawh a. Guardiola-a’n Catalan club hi Champions League, Fifa Club World Cup, Uefa Super Cup leh Spanish Super Cup- vawi hnih theuh leh La Liga leh Spanish Super Cup vawi thum ve ve a lakpui tumte khan a player hman thiam berte zinga mi a ni.

Heng hun lai hi PSG forward ni ta pawh hian a chhawr a, Ballon d’Or vawi sarih a lak tawh zinga pali hi Spanish coach kaihhruaina hnuaia a awm lai, 2009 leh 2012 inkar, kum zawna a lakte an ni.