Guinness World Record pathum zet siamtu Zion Clark hi Caudal Regression Syndrome natna hlauhawm tak avanga ke nei lo va piang a ni.

Mi thenkhat tan hi chuan harsatna engpawh hi hneh theih loh tur khawpa harsa hi a awm meuh lo. Harsatna an hmachhawn ngam a, eng harsatna pawh tawk se, hlen chhuah ngei an duh thin. Zion Clark hi chutiang zing a mi chu a ni a, harsatna hrang hrang hmachhawn mah se chhel takin a tawn lui a, vawi khat ni lo, vawi thum lai mai Guinness World Record a siam thei a ni. Wrestler hi natna hlauhawm tak Caudal Regression Syndrome vangin ke nei lovin a piang a ni. 

February 15, 2021 khan khawvela kut pahnih hmanga tlan chak ber record a lo siam tawh a, second 4.78 chhung lek chhungin a kut hmangin meter 20 zet a tlan thei a ni.  Tin, tun hnaiah world record dang pahnih a siam belh leh bawk. Guinness World Records official Twitter account-ah  video post a ni a, tah chuan Clark-a'n record ding lai pahnih a khum a ni. 

A record siam thar pakhat chu kut hmanga zuang sang ber record a ni. A khum tur record ding lai chu inches 24 a ni a, a tum hmasak berah Clark hi awlsam takin inches 30 zet a zuang nghal thei a, tichuan zuang nawnin inches 33 zeta sang zuangin record thar a siam ta a ni. 

A record thar dang leh chu minute thum chhunga diamond push-up tam ber record a ni a, record hmasa chuan minute 3 chhungin vawi 240 a thei. He record zet hi chu Clark-a tan pawh khum a harsa takzet tih a hriat. A tum hmasak ber ṭum phei chuan a hlawhchham chiang hle a, push-up 54 zetin record chu a phak lo a ni. Mahse, beidawng duh lo mihuaisen leh tumruh Clark-a chuan record thar siam ngei tumin a bei a. A hnuah chuan minute 3 chhungin push-up 248 ti theiin record thar a siam thei ta. 

Guinness World Record-a an video dah caption-ah chuan, “Chhuanlam siam ve ngai lo mipa Zion Clark-a'n World record thar pahnih a siam,” tiin an dah. 

Zion Clark-a video hian Twitter lamah comment a hlawh hle a. Mi chaklo te fuih thartu pawimawh a nih thu te, harsatna hmachhawn ngam loh vanga chhuanlam siam mai a that loh thu te a ni nawk.  

A nun chungchang sawi belhin Clark chuan video-ah hian, “Ka dam chhung kum 17 chhung zet chu foster care system-ah ka seilian a. Tin, chutah chuan hrehawmna nasa tak ka tuar a, tihduhdahna hrang hrang ka tuar thin a, rilru leh taksa min hliam thei tihduhdahna ka tawng nasa em em a ni. Chumi piah lamah chhungkua leh chenna nei lo ka ni a, kawng sira thi tura hnutchhiah mai mai kha Pathian hmel pu mihring nu pakhatin min adopt ta a ni. 

Chumi nu fel tak chuan enkawl sei lianin athletic te, wrestling leh professional track and field athlete a nih theih naturin a pui a ni. 

“Nun khirh tak ka hmachhawn a, fiahna leh hrehawm tam tak ka tawk tawh a mah se chung thil te chu tumruhna leh paukhauhna min siamtu an ni hlauh a, vawiin hi ka thlen phah ta a ni,” tiin Zion Clark chuan a sawi.