Erling Haaland-a’n Manchester City tan goal a thun mawlh mawlh a, record a siam zel bawk a; mahse, Inrinni zanah erawh Ilkay Gondugan-a’n a chhawk a, a goal hnih hmangin tlakhniam hlau, Leeds United chu 2-1 in an hneh.

Norwegian forward hi kan hria a, a thun reng mai a; mahse, coach thar Sam Allardyce-a kaihhruai team lakah erawh a ke a chawl ve ta rih a, a thun ngei tura ngaih penalty lah hattrick siamtir tumin German midfielder a kian bawk si a, goal a hawn thei ta lo.

Leeds an hneh hnuah hian City hi Premier League-ah a zawnin vawi 10 an chakna a ni ta a, khelh zat inangah Arsenal aiin point liin an sang ta a, khelh li bawk an la hmabak a, an tan nomawi a hla lo lehzual ta hle.

Etihad Stadium-a inkhelah hian Gundogan-a hian minute 19 leh 27-ah City tan a thun a, hun tawp dawnah substitute Rodrigo chuan Leeds tan si khat a sut a; mahse, inkhel pum thlirin Pep Guardiola team hian hnehna chan an phu zawk.

Phil Foden-a lakah Pascal Struijk-a’n penalty chawiin Haaland-a tan tun season-a goal 51 a thun tawh belhchhahna remchang ni mah se Gondugan-a tan hattrick siamna remchang a nih avangin a kian a, German midfielder hian ban a pet per hlauh thung.

Tun kar chhova Leeds-in an boss thar atana Allardyce an lak luh hlim khan England coach hlui hian Premier League-a coach-te zingah tumah a chunga leng an awm bik lo va, an intluk vek thu leh Guadiola nen pawh an danglam bik lo tih a sawi a. Kartawpa City an hmachhawn huna dan dan tur pawh a sawi nual a; mahse, a tak takah chuan a thei lo niin a ngaih theih.

Tlarhnung vengtu tur indah tama ven uluk a ngaih thu a sawi a, hei hi an inkhel thlir pawhin a dik tih a lang a; mahse, a tawp thleng erawh an dang zo ta lo va. Goal an thun ve pawh sawi nepsak duhtu tan chuan ‘an phu vanga thun an ni lo’ tih theih a ni.

Allardyce-a team hian khelh thum an la bak a, 17-naah awmin tlahniam thei sang ber, Nottingham Forest aia an sanna erawh goal difference chauh a ni a, Forest hian Thawhtanni zanah a mawng bera awm, Southamton an mikhual dawn a, point an hmuh chuan khelh zat inangah an lehpel nghal ang a, tlahniam thei dinhmun atangin an chhuak ang.

Hei mai a ni lo, 19-naa awm, Everton pawhin point khat chauhvin Leeds hi an phak lo va, anni pawh hian Thawhtanni zanah tho Brighton an tlawh dawn a, point thum an hawn thei a nih chuan an tlansan daih dawn bawk a; Allardyce-a team hi an la him lo tak zet a ni.

City erawh treble champion nih tuma an beihnaah an kawng zawh a la tluang rih zel a. Premier League-ah hian khelh li an la neihah point sarih an hmuh chuan an champion dawn a, point ruk chauh an hmu theih a nih pawhin goal difference that vanga nomawi la thei dinhmunah an ding cheu bawk.