American hard rock band lar Guns N’ Roses fan te tan chanchin lawmawm hriat tur a awm leh ta - single thar an tichhuak dawn e. An hla thar tur hi 'Any day now' tih a ni a, October thla khian tihchhuah an tum a ni. 

Hla thar an tihchhuah tur chungchang hi an lo sawi thawi fo tawh thin a, tunah chuan a chiang tawh. Hla hi an record tawh a, tihchhuah mai turin an peih fel tawh nia tarlan a ni. 

Guns N’ Roses production manager Tom Mayhue chuan hemi chungchang hi tun hnai khan a rawn puang chiang a, fan lam pawh an phur tawh hle. An hla thar tur hi an debut album 1987-a tihchhuah ‘Appetite For Destruction’ nen khan a music kal phung a inzul viau niin a sawi bawk. 

An band guitarist Slash chuan nikum khan hla thar tihchhuah leh an duh thu leh hma an lak thu a sawi a, rimawi chawlh san mai an la tum lo tih a tichiang. Guns N’ Roses hian kumin khan Glastonbury-ah headline changin boruak an nei lian hle a, an kalna a piangah an thawm a la na rem rem hle.