Aizawl: Governor Lt. Gen. Nirbhay Sharma kaihhruaiin Zirtawp tlai khan Raj Bhavan-ah September ni 15 atanga October ni 2 thlenga hman tur ‘Swachhta hi Sewa’ hawnna neih a ni a. Faina kawnga chak zawka hma lak dan turte an sawiho. He meeting-ah hian faina kawnga sawrkar hmalaknate thlirhona neih a ni a. District 8 zinga 5 te chu Open Defecation Free (ODF)-a puan a nih tawh thu tarlan a ni. UD&PA department bultumin census town 23-ah khawpui fai inelna chu kalpui mek niin, Biate pawh Asia khawmuala khaw fai ber ni turin ruahmanna a awm mek thu tarlan a ni. Faina kawnga program hrang hrang te chu a aia chak zawka kalpui a, India rama state fai ber nih an tum thu an sawi bawk a ni. Prime Minister-in August ni 27, 2017 a ‘Maan Ki Baat’ radio program-a a lo sawi angin faina beihpui ‘Swachhta hi Sewa’ chu September ni 15 atanga October ni 2, 2017 thleng hman atan ruahman a ni a. He campaign-in a tum bulpui ber chu rampum huapa a ruala faina beihpui thlak a ni.