ZALEN January 21, 2026: Sports & Youth Services leh Tourism Department Minister Lalnghinglova Hmar chuan vawiin khan Mizoram House, Guwahati-ah Aizawl International Half Marathon (AIHM) 2026 leh Mizoram Tourism chungchangah Press Conference a nei a. Minister chuan AIHM 2026 chu February ni 14 ah neih tur a nih thu leh, mi thahnem tak tel tura beisei a nih thu a puang a. Mizoram tlawhtu khualzin an pung nasa tih sawiin, 2025-ah state pawn mi 8,41,322 in Mizoram tlawhin, 2024 a tlawhtu aiin 96.9% in a tam tih a tarlang.

Lalnghinglova Hmar chuan April, 2025 ah Sports & Youth Services Department, Government of Mizoram leh Innovations India te’n a vawikhatna’n AIHM an buatsaih tih sawiin, “Motor leh thlawhtheihna hmang chauha Mizoram kal theih a ni chungin AIHM 2025 ah state pawn mi thahnem tak an tel a. Athlete, official leh mipui nawlpuiin an hlut hle. Tunah chuan Sairang thleng rel a lut tawh a. Mizoram chu Guwahati rel station atangin tlai khat thilthuah a thlen theih a, thlawhtheihna phei chuan minute 40 thlawk chauh a ni. AIHM 2026 ah chuan state pawn, a bikin Assam atanga tam lehzual an rawn tel ngei kan beisei.” a ti.

Sports Minister chuan AIHM 2026 khuhhawnna Press Conference chu nikum October thlaah New Delhi-ah neih a ni tih a tarlang a. “Inkalpawhna harsat vang leh thlawhtheihna chuan man to vang te, kan inphochhuah thiam loh vangtein Mizoram tlawhtu an thahnem lo thin a. Tunah chuan rel hmangin awlsam leh man tlawm zawkin a kal zung zung theih tawh a, ‘state kilkhawr’ ti a hriat thin chu a inthlak mek. Aizawl chu sawi loh, Mizoram pawh la hrechiang lote hnenah Mizoram tihlar kan duh a, Aizawl International Half Marathon hmanga Mizoram nawmzia puanzar tel kan duh,” a ti bawk.

Tourism Minister ni bawk Lalnghinglova Hmar chuan Aizawl chu India ram krismas khawpui, ‘Christmas capital of India’ ah chantir an duh thu a sawi a, “Thlasik boruak nawm lai takin Lammual-ah ‘Winter Festival’ buatsaih a ni a, mipuiin an hlut hle. December 23 & 24 ah Aizawl khawpuia kawng lun lai ber chu ‘No vehicle zone’ niin mihring tan hawn a ni a, intihhlimna hrang hrang buatsaih a ni thin. December 23 ah ‘Christmas Parade’ hlimawm tak neih thin a ni bawk.” a ti a. December 26-a ‘Krismas Ruaitheh’ chu India ram hmun danga awm ve lo, Aizawl leh Mizoram krismas lawm dan tihlutu leh chhim tichakawmtu a ni, a ti. December 31-ah Sakawrhmuituai tlang mawi tak atangin music nen a huhova kumhlui thlahho thin a nih thu a tarlang bawk.

Minister chuan Covid-19 boruak reh hnuah a kum telin Mizoram tlawhtu an pung tih sawiin, “State lian zawkte nen khualzin zat ngau ngau khaikhin chi ni lo mah se, kum 2023 atanga 2024 ah 130% chuangin Mizoram tlawhtu an pung a, kum 2025 ah pawh a 96.9% in an la pung. Hei hian Mizoram chu tourist te tlawh chak ber zinga mi a ni zel tih a lantir a, kum 2026 ah pawh India rama tourist destination thlanawm ber zingah kan tel ka ring tlat a ni,” a ti.