ZALEN August 20, 2026 : H. Lalramdinpuii, Mualthuam North thah a nih chungchanga thubuai Lunglei Police Station Case No. 84/2026 u/s 103(1)/140(1) BNS hmanga chhuiah rinhlelh kai mi pahnih an inpuang a, Lunglei Police Special Investigation Team (SIT) te chuan Nilainiah khan an man nghal.

SIT te hian a tir atangin uluk takin he thubuai hi an chhui a, rinhlelh kai Mualthuam North ve ve, Denghmingthanga (20) leh Lalneihkima (34) te chu vawi tam tak an thu an zawt fiah tawh a ni. Police te chuan an phone hman dan (digital evidence) leh forensic evidence atanga rinhlelhna awmte chik taka an chhui zel hnuah zawhna chi hrang hrang an hmachhawn a, Ninganiah hian an pahnihin SIT-te hmaah an inpuang ta a ni.

An inpuanna hi bawhzuiin dan ang takin Ningani chawhnu dar 1 ah khan man an ni a, chawhnuah vek khan Judicial Custody-ah dah chhunzawm an ni bawk.

Tualthahna thil thlen dan kimchang leh finfiahna (evidence) hrang hrangte erawh chhui chhuah hna an la kalpui mek avang leh case chhui zelna a tihbuai loh nan tarlan a la ni rih lo a. Police te chuan mipuite chu police hnuchhuitute hmalakna ngaichang zel tur leh mahni thua hma la mai lo turin an an ngen zui bawk.