ZALEN November 17, 2024 : Forensic Science Laboratory-a director hna chelh mek, H. Sangchungnunga chu Ministry of Home Affairs chuan a hnathawh that vangin ‘Life Time Achivement Award in Forensic Science’ dawng turin a thlang.

Sawrkar laipui, Ministry of Home Affairs chuan February, 2024 atangin ‘Kendrya Grihmantri Dakshata Padak’ hnuaiah ‘Forensic Science Field’-ah award hrang hrang a siam tan a, award hi chi hrang hrang pariat siam niin heng zinga ngaihsan ber nia ngaih, ‘Forensic Science Field’ dawng turin H. Sangchungnunga hi thlan a ni a. Award dawng tura thlan a nih thu hi October 30, 2024 tlai khan puan a ni a, award pek hun tur erawh a la hriat loh thung.

ZALEN-in a kawmnaah FSL Director H.Sangchungnunga chuan award a dawn theih chhan chu a thawhpuite nen thawhhona tha tak an neih vang a ni tih sawiin, “Award ka dawng dawn tih min hrilh chuan ka phu zawk mai a, kawng lehlamah erawh chuan phu ve hle chuan ka inhria a, ka lawm hle a ni,” a ti.

Award a dawn theih chhan chi hrang hrang a awm nia sawiin H. Sangchungnunga chuan, “Tunhma chuan Forensic Laboratory hi police modernization grant hnuai atanga pawisa hmu leh hnathawk thin kan ni a. Keini state-te phei chuan hemi hnuai atang hian sum kan hmu tha hle a; mahse, India ram state tam takah sum an hmuh that loh avangin forensic hi a changtlung thei lo va. Chuvangin, kan tan bika sum pe chhuak tur hian sawrkar laipuiah memmorundum vawi hnih ka thehlut a, ka dilna hi sawrkar laipui pawhin min remtihsakin a hranpain grant hi min pe ve ta a ni,” a ti.

Hei baka Mizoram Forensic Science Laboratory a chungnun bik dan sawiin FSL director chuan, “Mizoram FSL hi India rama laboratory tha ber zinga mi a ni a. All India-a paperless expert report system hmang hmasa ber leh awm chhun kan ni a, India rama case pending nei miah lo awm chhun kan nih bakah online case tracking system nei awm chhun kan nih bawk avangin award pawh hi kan phu ve hlein ka hria a ni,” a ti bawk.

H. Sangchungnunga hi tun hma chuan Science & Technology department-ah a thawk thin a. Kum 1998 khan khatih laia DGP Lalngheta Sailo chuan Forensic Science Laboratory dinpui atana sawmin bul an tan a. Kum 1999 chhung training neiin kum 2000 atang khan case exam hna an thawk tan a, ganja case chu an case exam hmasa ber a ni.

Forensic Science Laboratory Director H. Sangchungnunga hi Mampui, Lawngtlai district-a piang a ni a. Sept. 18, 1998 khan Forensic Science Officer hna a chelh tan a, July 13, 2015 khan director-ah a kaisang a ni.

Home ministry hian kum 2024 atang hian police leh forensic science-a thawk tha chungchuang hnenah Kendriya Grihmantri Dakshata Padak hi a sem chhunzawm thin tawh dawn a, H. Sangchungnunga hi Mizo zinga ‘Life Time Achivement Award in Forensic Science’ dawng hmasa ber a ni.