Premier League lama a season khelh hmasak bera tum 3 zet hattrick siam tawh Erling Haaland chu fakin Manchester City manager Pep Guardiola chuan,"City striker Erling Haaland hian tun anga goal a khung chho zel a nih chuan season khat chhungin Premier League goal khung hnem ber record thar a siam ngeiin ka ring," a ti. 

Kum 22 mi Haaland hian Premier League season kal mekah game 11 atangin goal 17 zet a khung tawh a, season liam ta khan Haaland-a aia goal khung hnem hi Premier League player zingah mi pathum bak an awm lo. Haaland hian game khata goal 1.54 zel khung ang a ni. City game hnuhnung berah pawh khan Brighton lakah goal hnih a khung thei a ni.

Premier League top scorer ni mek Haaland hian tun season-ah competition hrang hrangah game 15 a khelh tawh atangin goal 22 zet a khung tawh a, Haaland hi Europe-a league lian pangaa goal-a inrawlh hnem ber a ni bawk.

Goal 34 khungtu Alan Shearer leh Andy Cole te chu Premier League season khat chhunga goal khung hnem ber an ni a, tun ang renga a kal chho a nih chuan Haaland-a tan khum a har hranin a rinawm loh. 

Guardiola chuan,"Tuna ang zel a a kal chho a nih chuan game khata a khung zat chawhrual ang hi a nih zel bawk chuan khel lovin record ding lai chu awlsam takin Haaland chuan record thar a siam thei dawn a ni. Samuel Eto'o, Messi, Robert Lewandowski, Thomas Muller leh Sergio Aguero te angin goal khung kawngah la vir deuh phei seng chuan tluk rual a ni lo va," a ti.