Manchester City striker Erling Haaland chu Premier League season khata goal thun tam ber a ni ta.

Norwegian hian Nilaini zan khan league-a a goal 35-na thun a team chu West Ham lakah si thum faiin hnehna a chanpui a, Alan Shearer leh Andrew Cole ten goal 34 an lo thun tawh chu a khum ta.

Haaland-a ropui bikna chu season khata inkhel vawi 38 chauh a awmnaah heti zat hi goal a thun a, Mohamed Salah-a’n 2017-18 chhunga Liverpool tana goal 32 a thun kha inkhel vawi 38 awm china thun tam ber a ni a, hei phei hi chu a khumna a rei tawh a ni.

“Zan bik a ni a, hun pawimawh bik a ni. Ka hlim tak zet a, ka inchhuang hle a ni,” tiin inkhelh zawhah Sky Sports hnenah a sawi.

Kum 22 chauh a ni a, khelh nga an la bak a, a goal thun theih dan enin a thun belh ngei a rinawm hle.

“A nuam a, ka hlim a, point thum kan hmuh leh avangin ka hlim tak zet bawk,” tiin BBC Match of the Day hnenah a sawi a. “Eng pawh ni sela, ka hlim a, thil a kaltluang a, kan khelh apiang kan thlir a ngai a. A hmaa ka sawi tawh thin angin kan team thiltih a ni a, team hi kan tha a, ka hlim a ni,” a ti.

Haaland-a’n Etihad Stadium-a goal a thun hma hian Nathan Ake chuan thunin hun tawp dawnah Phil Foden-a’n a thun belh bawk a, City hian khelh khata khel tlem zawk chungin Arsenal an lehpel zui lehnghal a, Premier League chung berah an awm leh ta.

Inkhelh zawhah a thiante chuan boss Pep Guardiola leh backroom staff zawng zawng nen khelmual chhungah zahna an hlan.

“Hetiang hi ka la tawng ngai lo,” tiin a sawi.

Cole-a hian Newcastle United tan 1993-94 leh Shearer-a’n Blackburn Rovers tan a dawt chiah season-a goal 34 an thun lai hian team 22-in league sang ber an khelh thin lai niin inkhel vawi 42 lai a awm tihna a ni a. Shearer hian khel kim vekin Cole hian vawi hnih a khel kim thei lo thung.

English football-a a season khatna la hmang chauh, Haaland hi chuan heng zawng zawng hi vawi 31 a khelhnaah a khum vek thei a ni.

Premier League a nih hma, Division One a nih lai khan Ron Davies chuan Southamton tan 1966-67 khan goal 37 a lo thun tawh a, hemi hnua league sang bera season khata thun tam leh ber a ni a. Dixie Dean-a khan 1927-28 khan Everton tan khelh 39-ah goal 60 a lo thun tawh bawk.

Haaland fakna hi hmun tin hmun tangah a ri tih tur a ni a. City manager Guardiola chuan, “A pui a ni. Kum 22 chauh a la ni a, vawi nga khelh a la nei,” a ti.

“Minute 60 chhunga hattrick a siam hnuah vawi engzat nge ka lak chhua? A thun belh thei a, a inhliam thei bawk. Mi bik a ni a, ka lawmpui a ni.

“Goal a thun hi kan beisei a ni a, Cole leh Shearer-a record a khum ta. Premier League erawh a duh ber niin ka hria,” a ti.

Spanish manager chuan Sky Sports hnenah, “A awihwm loh zawk. Goal pawimawh, kan chakna engzat nge a thun tawh? Mi danglam leh bik a ni a. Zahna hlan kha a phu a ni,” tiin guard of honour an pek chungchang a sawi bawk.

West Ham laka goal hmahruai thuntu, Ake pawhin, “A lo kal a, ni tin hetiang hi a ti mai. A tawn zawng zawng hi a phu a, a thawk rim a, top player a ni,” a ti.

Premier League-ah hian Haaland hian a team champion-pui a hnaih zel a, khelh nga an la neihah point khatin hma an hruai a, a lehpel thei hnai ber, Gunners aiin an khel tlem zawk bawk.

FA Cup final-ah Manchester United an la hmachhawn dawn a, Champions League semifinal an lut tawh bawk a. Nomawi pathum lak rual an tumnaah kawng dik an la zawh zel rih.