Aizawl April 13, 2023 ; Vawiin khan Hachhek bial chhunga West Bunghmun-ah MNF Adviser leh Minister ni bawk Robert Romawia Royte chuan Congress Party leh BJP Party atangin MNF zawmthar a lawmlut a, Robert-a chuan Hachhek bial chu MLA bial hmasawn chak ber ni turin tan an lak tur thu a sawi.

Minority Affairs Minister Robert Romawia Royte chuan, “Mamit district chu India rama district hnufual zual 124 thlanchhuah zingah a tel avangin he district hmasawnna tura mumal taka ruahmanna (Projects) siam chuan sum sanction turin Central sawrkar a inhawng hle tih sawiin, hei hi Sports Deptt leh ICT Department-in anmahni zawna projects an siamte hmanga Mamit district-a hmasawnna hna an thawh hian atakin a tichiang a ni. Tunah pawh ruahmanna thar siam mek a ni a. Mamit district-a Hachhek bial chu mi taima leh kuthnathawk hlawhtling tamna bial niin Kuhva china an hlawhtlinna chu Zoram hmun dang entawn tlak a ni a, Langkai balu thatzia pawh Zoram mipuiin an hre tawh. Hachhek bial hi MLA bial hmasawn chak ber ni turin tan kan la dawn a ni,” a ti.

ZPM-ina na puhna chungchang sawiin MNF Adviser Robert-a chuan, “ZPM Party-in Governor-a MLA atanga  bang tura min hekna chu Assembly House a ZPM Leader Lalduhawman dawt a sawi avanga ngaihdam min dil vang niin mipuiin an ngai a. Min heknaah thudik a lan chhuah mek avangin hun nei tlem tawhah an inngai nge ni vawiinah pawh keima chungchangah Vanapa Hall kawtah a vawi 3 nan an kalkhawm leh an ti,” a ti.

Robert Romawia Royte chuan MNF Sawrkarin covid hripui karah pawh thil tha tam tak a tih avang leh mipuiin Chief Minister Zoramthanga kaihhruai sawrkar thil tih that an hmuh zel avangin Mizoram hmun hrang hrangah MNF zawmtu an pung chak hle, a ti. Covid hripui avanga sum harsatna karah SEDP pawh sem mek zel a ni. Tunah hian SEDP dawng thar tur pawh thlan a hun leh dawn a, SEDP sawiseltu leh hlawhchhampui tur ni lo a taka hlawhtlin puitu tur thlan thiam a tul tih a sawi bawk.