Aizawl; Nikum November thla atang sorkarin mau sah a remtih hnu-ah, state pawnah Mizoram mau, truck trip 4,000 dawn lai thawn chhuah leh a ni tawh. Nikum November thla khan permit neite tan mau sah remtih a ni a, Bairabi leh a chhehvel atangin Hailakandi Dist.-a Panchgram-a Hindustan Paper Corporation-a hman tur, mau truck trip 4,000 dawn lai thawn thlak a ni leh tawh a, mau sah phalna neite hi Mizo vek an ni a, Hindustan Paper Corporation hian mau pum khat hi Rs. 9/- leh Rs. 10/- in an lei a, sorkar-in mau pum 1 ah duli zel a la a ni. Thu lakna tarlan danin, tunah hian nitin mau truck trip 200 atanga 300 vel, Tlawng dung atang hian thawnchhuah a ni a, permit neite hi Mizo vek ni mah se, a sat tute chu hnam dang vek an ni a, heng mite hian mau no deuhte pawh an sat vek zel niin an sawi. Mau sat tute hian lui dungah mau sah tur a awm tawh mang lo niin an sawi a, mau sat tur hian lui atanga km 2 dawn lai kal a ngai a, lui hnaia mi chu an sat rem deuh vek tawh niin an sawi bawk.