Tun laia social media lama thawm nei lian ber chu Selena Gomez leh Hailey Bieber te inbakkaih chungchang hi a ni. A reh mai dawn emaw tih hnuah pawh a vung leh hluai thin a - Hailey Bieber phei chuan thaha vauna hial a dawng ta. Hetih lai hian Selena Gomez chuan a fante chu insum turin a ti a, Hailey Bieber vau tawh lo turin a ngen nghal bawk. 

An inbia e
American singer Selena Gomez chuan an buaina chungchangah hian Hailey Bieber chu a be pawp tawh tih a sawi a, an chunga thil thleng chu a duhdan a nih loh thu a hrilh. Kum 30 mi Selena chuan, "Thil thleng hi ka duh lo khawp mai, tu chungah mah thleng turin ka duh lo," tiin a sawi a, an inkar buai titawp a nih theih nan fante chu zahngai turin a ngen bawk. 

Selena hian February thla khan social media a chawlhsan lailawk tur thu a sawi a, mahse a sawi ang hian a awm zui lo. Hailey Bieber nen an inkar a chhiat zui avangin social media lamah a active zual sauh emaw tih tur a ni a, Instagram lamah thawm a nei ring hle. 

Thaha vauna chu...
Milarte hian an mahni ngaisangtu fan ruhkawl an nei theuh a, heng mite hi an thikthu a chhe thin hle. Selena Gomez leh Hailey Bieber te inkara buaina a awm chhan pakhat pawh hi an fante vang a ni pakhat a, a reh mai dawn emaw tih hnuah a punlun zawngin thil an kalpui a ni. 

Selena Gomez thlavang hauhtute chuan Justin Bieber-a nupui Hailey Bieber chu na takin an bei. A tirah thu hmangin an inbei a, mahse a tawp zui mai lo - Hailey Bieber chuan thaha vauna hial a tawk ta a ni. 

An chunga thil thleng hi duh aia a punlun chhoh tak zel avangin Selena chuan American model Hailey hi a be pawp ta ringawt a, boruak tha neih a duh tawh niin a lang. Inbiakna an neih hnu hian Selena chuan a fante chu Hailey vau tawh lo turin a ngen zui bawk. 

Queen of Instagram
Selena Gomez hi Instagram-ah a lar hle a, follower ngah ber pawh a ni. Hei vang hian a hming lemah 'Queen of Instagram' tih a ni hial a, hei hi fante pawhin chhuang takin an sawi thin. Mahse social media a khawih loh chhungin Kylie Jenner chuan a rawn leh pel ta mai a, buaina a intan chho chu a ni ta der.  

American media personality Kylie Jenner hi Hailey Bieber thian hnai tak a ni a, Selena nena boruak an neih chhonaah pawh hian Kylie hi a inrawlh niin khawthlang media te chuan an tarlang. Kylie Jenner hian IG-a follower ngah ber nih a duh a, Selena hi a er ru viau niin an sawi.  

Kylie Jenner hian hun eng emaw tichhung chu IG-a follower ngah ber dinhmun a luah hman nghe nghe a, mahse Selena a rawn come-back hnuah erawh thil a danglam leh nghal vek. Selena hi hmeichhe piang tawh zinga Instagram-a follower maktaduai 400 nei tling hmasa ber a rawn ni hem mai - tun dinhmunah chuan follower hi maktaduai 403 a nei. Tun hnaiah ringawt pawh follower hi maktaduai eng emaw zat a neih belh tihna a nih chu. 

Hetih lai hian Kylie Jenner leh Hailey Bieber te erawh chu mi tam takin an unfollow ve thung. Kum 25 mi Kylie Kristen Jenner hian follower maktaduai 383 a nei mek a, Selena nen an inkar a zau leh ta hle. An buaina hian nghawng a nei lian viau a, a tawp mai pawh a rinawm loh - social media kaltlanga inbeihna a nih miau avangin an thar thawh fo bawkin a rinawm.