Aizawl; Mizo Zirlai Pawl (MZP) buatsaihin December 3-5,2014 inkar chhung hian Haflong, Assam -ah 'Insuihkhawm leh zai i rel ang u' tih thupui hmangin Zofest tum 6-na neih a ni dawn. Zofest 2014 neih tur chungchang sawifiah hian nimin khan MZP hruaitute chuan Aizawl Press Club ah chanchinbumite an kawm a, MZP President Lalhmachhuana chuan Zofest neihna atan hian Haflong-a Muolhoi public ground ah pandal sak a ni tih a sawi a. Zofest ah hian riaklut palai 1200 atanga 1500 vel an beisei tih sawiin Bangladesh, Myanmar leh India ram chhung State hrang hrang- Mizoram, Manipur, Tripura, Assam, Meghalaya leh Arunachal Pradesh a cheng Zofa chipeng hrang hrang atangin palai thahnem tak an fuankhawm dawn niin a sawi bawk. Zofest 2014 thupui atana thlan, “Insuihkhawm leh zai i rel ang u” tih hmangin Professor C. Nunthara leh L.Keivom IFS (Retd.) ten thu an sawi dawn a ni.