Aizawl SP chuan thuthar theh darhtute kawmin  Mizoram sawrkar chuan silai lem a mu kap thei, halpuah, halmawi, meithallawn (rocket & sky lantern) te chu zawrh leh hman khap a nih thu a hrilh a, October thla khan khapna thupek tihchhuah ni tawhin a sawi bawk. Heng thil te hi hunpui lawm nana hman thin ni mahse midang ti na thei leh hnawksak  an nih avangin khap an nih thu SP chuan a sawi a ni.

SP sawi danin kumin hian khauh takin he thupek hi kenkawh a ni nghal a, sumdawng dawr leh kudamte enfiah reng a nih bakah khap thil zuarte chu mana thubuai siamsak nghal zel an ni bawk ang.

Kum dangah heng thil te hi khap a lo ni tawh thin a, zawm a hlawh lo viau a. Kum dangah pawh  tan lak ni thinin Aizawl district ah chuan Krimas leh Kumthar vuakvetah case 22 ziahluh niin mi 28 lai thubuai siamsak an ni a, mi 7 te chu hremna tihchhuah tawh a ni bawk a. Heti chung hian nikum kumhlui thlah zanah erawh halmawi leh a kaihhnawih te hi nasa taka hal an ni tho a ni.

Kuminah pawh Mizoram sawrkar chuan thuchhuah siamin hunpui boruak in min chiah hmain  hma an la tan tawh a, kum dang aiin hmalakna hmuh tur a awm hmaa kori a tu turah ngaih sak phawt ila a tha awm e.

Heng khap thil te hi midang tina thei thil an ni a, halmawi ang chi phei chu a siamtu company lam mumal lo tak tak te an ni a,  zen hmang chi phei chu mihring hriselna ti chhe thei tehkhawng pawh finfiah nilote an ni hlawm a. Hei vang hian kumhlui thlah zan thlen hmaa damlo hmun dang panpui ngaite pawh kan nei thin a, ran vulh thlengin an tuar thin a ni. 

Kumin hi khauh a ngai dawn hlein a lang zual a, hripui vangin smdawngte an bet rei a sum hailuh thuah thahnemngaih na a na thei mai thei a, mipui rilruah inhrikthlak duhna a lian thei bawk. Kum dangah khap ni thin mahse a hmangtu lam thlengin dan anga kutthlak zui a nih meuh loh avang hian  mipui lam pawhin an palzam leh mai thin niin a lang a. Hei hian khapna thupek a tichak lo zual thin a ni. 

Sawrkar hian hlawhtlinpui a duh tak tak a nih chuan tun atanga hma a lak hi a aia nasain a tih a ngai a,  mipuiah ngenna a tih chhuah fo a hun tawh viau a, a zuar mante pawh zing zawka tlangzarh a that a rinawm bawk a. A nih loh chuan Mas leh Kumthar boruakin min nan tawh chuan kan indang zo tak tak lo ang tihte a hlauhawm e.

Eng pawh nise thuneitute sawi ang hian kumin Diwali ah pawh halpuah leh halmawi hmang hriattur a awm lo a, a lo tilui tlemte  chu umzui an ni a. Hetiang a nih chuan Mas leh Kumthar vuakvetah hian mipui lam pawhin chhuanlam zawng loin sawrkar thupek zawm tum theuh a ngai a ni.