ZALEN January 5, 2025: Mizoram Pollution Control Board chuan boruak hrisel dan a enfiahna khawlpui ber Sikulpuikawna real time data hmuh theihna chu Central lamah khawl a chian loh avangin zanlai data an hre thei lo a, January ni 2 chhun dar 12:00 vel khan Aizawl AQI chu 80 a ni.

AQI 80 chuang a kai hi halpuah hal atanga darkar 36 hnu a ni. Halpuah hal hma ni 31.12.2025 tlai dar 4:00-ah chuan AQI chu 38 a ni a, heta tanga a lan danin AQI hi a let 2 chuang (210%) hretin a hniam berah a pung a ni.

Data atanga a landanin boruaka bawlhhlawh sin te bik, particulate matter 2.5 micron, (PM2.5) hi khawpuiah a pung chho nasa hle. December thla bikah hian kum 2024 ah PM2.5 hi chawhrualin 19 µg/m³ a nih laiin kum 2025 ah chuan 38 µg/m³ a kai chho tawh a, a letin a pung tihna ni a. PM2.5 hi chuapa lut awlsam, paih chhuah leh theih si lo a tang ta tlat thin a nih avangin a pawi zual a ni. 

Kumtluana boruak dinhmun thlirin Aizawl khawpui boruak hi a kum telin a letin a bawlhhlawh tial tial a ni tih a tilang. Boruak tibawlhhlawh thei thil hal lo tura mimal, pawl leh sawrkar pawhin tan an lak deuh deuh a pawimawh hle a ni.

MPCB Member Secretary C. Lalduhawma, chuan kum hmasa lam ang lo takin kumin chu boruak bawlhhlawh insem darh kiang tura an beisei tawh laiin, ala kiang tha hleitheilo tih a sawi a, December thla chhunga Air Quality Index (AQI) 30-35 bawr vela chawhrual theih chu January 2 tuk thleng khan AQI 80 bawr velah a la then (fluctuate) deuh reng a ti a. Khua a vawhin boruak bawlhlawh a darh mai piah lamah chunglam boruaka bawlhhlawh thenkhatte chu hnuai lamah a tlak thin avangin hriselna pan chi deuh tan in uluk a ngaih thu leh pawn chhuah dawn pawhin mask vuah a finthlak thu a sawi bawk.