ZALEN Dec. 9, 2025: Kum 2025 krismas leh kumthar 2026 vuakvet-ah Serchhip District-ah halpuah leh halmawi khapna thupek tihchhuah a ni.

Hemi chungchanga Serchhip District Magistrate, Paul L. Khuma’n nimin (Dec. 8, 2025)-a thupek a tihchhuah ah Halpuah leh halmawite hian nasa takin mihring hriselna a tichhe thei a, boruak a tihchhiat leh tihbawlhhlawh mai bakah ri bengchheng a siam thu tarlangin, heng bakah hian silai lem a mu nei chite chuan mihring piansualna a thlen tak fo bakah tul lova sum khawhralna a ni bawk tih a tarlang a. Kum 2025 Krismas leh kumthar 2026 hlim tak leh thlamuang taka kan hman tlan theih nan Section 163 of Bharatiya Nagarik Suraksha Sanhita, 2023 tlawhchhanin thupek tihchhuah a nih thu a tarlang a ni.

Serchhip District Magistrate in thupek a tihchhuah ah hian Halpuah, Halmawi, Sky Lantern leh puakthei thil dang boruak tha lo siam thei leh ri bengchheng siam thei chi reng reng lak luh, zawrh, hralh, hal leh hman khap tlat a nih thu leh Naupang silai lem a mu hmang chi reng reng lakluh, zawrh leh hralh khap tlat a nih thu a tarlang a. He thupek hian thu leh awm hma chu Order chhuah a nih (Dec. 8, 2025) atanga thla hnih (2) chhung huam tur niin thupek zawm lo chu Section 223 of Bharatiya Nyaya Sanhita, 2023 dan hmangin hrem theih an ni ang tih a tarlang bawk.