RBI hmunpui chu Kolkata a ni thin a, 1937 ah Mumbai ah sawn a ni. India in zalenna a hmuh hnu 1947 kum tawp lamah Central Sawrkar chuan RBI chu ram pum bank turin a siam tana, 1949 ah Sawrkar ta bil ni turin hlankai a ni bawk. 1950 ah PM Nehru chuan RBI hi mumal zawka a kal theih nan dan leh hrai a siam nasa a, pangngai taka a kal emaw tih laiin 1991 khan RBI chu a tluchhe ta a, US $ lakah 18% ngawt in a tlawm a, hei hian dan him zawk a cho chhuah phah a ni. 2000 hma kha Rupee hlutna a chhoh theih nan thapui tak taka beih a ni a, bank dangte’n sum an puk dan te siam danglam in RBI chu nghet zawkin a ding thei ta a ni. Ram tin hian Bank in chhunluhna Central Bank an nei a, India ah chuan Reserve Bank of India a ni a, 1935 khan Hilton Young Comission chuan RBI hi Nuai 500 in a din a. Khatih lai kha chuan share neitute chu mimal deuh vek an ni a, India Sawrkar chuan ` 220,000 chauh share a nei a ni. Mimal bank ah sawrkarin share a lei ve chauh tihna a ni. Indian Rupee chhutna bik offset khawl a hran siam RBI hian a nei a, siam chhawn theih mai mai loh Rupee chhut nan chauh a hman tur lehkha than a siam tira, chuti chung chuan pawisa lem siamtute chuan hetiang ang deuh lehkha puan an nei ve leh thei zela. Hemi avang hian ` 500 leh ` 1000 phek te chu a khat tawka tihdanglam reng a ni a, a lem siamtute chu tlankhalh reng an ngai. Rupee chhutna lehkha tui ‘ink’ a bika siam RBI chuan a hmanga, thim thama eng thei flourosence ink a hmang tel bawk a. A ngila en leh en dan angle thlakin a rawng a danglam thei a, hawrrawp sin te tein watermark RBI tih chu nemkai a ni bawk a. Security thread tia vuah lazai phek a vang zawnga phum a ni a, RBI tih a inchhu vek bawk. Mahatma Gandhi lem, RBI seal, Ashoka Pillar te chu khawihin a pawng tih a hriat theih a. Nikum laihawl khan 500 leh 1000 phek ah hian lekha tui ‘ink’ danglam tak mai a hmang leh tan a, pawisa pheka a bial (circled) a duma chhut chu a ti lian a, pawisa number pawh hawrrawp in len hleihin a chhu tawh bawk a ni.