Aizawl March 21, 2023 : Dy. Chief Minister Tawnluia chuan vawiin khan Zarkawt High Field-a Multipurpose Ground sakna tur lungphum a phum a. Tun ministry-a hripui leh harsatna tam tak karah Smart City Mission hnuaiah hna 30 chuang thawh mek a nih thu a sawi.

Tawnluia chuan ram tana ro tling tur project lung phum a ni chu lawmawm a tih thu sawiin, "Covid avang khan Smart City Mission hnuaia hna bul a tan hleih theih loh a. Chuti chung chuan tunah hian project hrang hrang 30 chuang kan nei a. A tam zawk hi chu kan thawk tawh a, zawh tawh pathum pali vel kan nei. Tin, hna 10 chu estimate siam tawh, tender kan la koh loh te an ni. Kan hmabak zingah Laldenga Cultural Centre tur pawh a tel," a ti.

Sipai Lammuala Laldenga Centre sak turah pawh Union Home Minister in lung a phum dawn tih a sawi a. Delhi-ah Chief Minister Zoramthanga leh Union Home Minister-te vawiina an inkawm thu leh Union HM chu Mizorama lo zin tur a ni tih a sawi bawk.

Dy. Chief Minister chuan Smart City Misson hnuaiah India ram state zinga a titha zinga tel chu lawmawm a tih thu te, hmasawnna tha zawk neih theih nana mamawh zingah playground paruk pasarih vel kalpui mek a nih thu leh multipurpose ground tur pawh a tangkai hle dawn a ni, a ti.

Multipurpose Ground at High Field, Zarkawt project hi Rs. 16.06 Crore man a ni a. Cricket pitch, Outdoor Gym, 4wheeler 80 leh 2wheeler 47 parking bakah cycle track leh elevated jogging track a awm dawn a, playground area chu 73x33m a ni bawk ang.