Aizawl: Rilru leh a kaihhnawih harsatna chi hrang hrang neiten an harsatna leh manganna an thlenna tur leh a tul anga hma laksak tura din, State TeleMANAS chu harsatna neiten hmang tangkai se an duh tih health department thawktute chuan an sawi a. Mizorama TeleMANAS chu India state zinga ti tha pawl niin an sawi.

ZALEN-in a kawmnaah Dr. Robert L Khawlhring, SNO, National Mental Health Programme cum SPO, TeleMANAS chuan rilru lama harsatna neite tan engtik lai pawhin (24 hrs) biakpawh theih an ni tih a sawi.

“Rilru lama harsatna leh eng emaw buaina nei tan englai pawhin (24x7) phone no. 14416-ah biak theih a ni a, phone hman man hi a thlawn (toll free) niin Hindi, English, Mizo, Nepali leh Mara tawngten harsatna thlen theih a ni,” a ti.

Phone a bepawp tu te hming leh nihna dang hi thup tlat a ni tih sawi bawkin, "Kan hnena harsatna thlentute nihna hi thup tlat a ni a, chuvangin harsatna nei ten inthlahrung lovin min rawn pan se kan duh a. Midangte harsatna pui tur hian kan inhawng reng a, hei hi mipuiin chhawr tangkai se kan duh hle a ni," ti bawkin harsatna thlentute hi mithiam ten an lo chinfelpui thin dawn niin a sawi bawk.

TeleMANAS thatna sawiin Dr. Robert L Khawlhring chuan, "Rilru lama harsatna nei thenkhat chuan Doctor te an pan a ngai a, mi thenkhat chuan hetia han pan hi an hreh a. Mahse TeleMANAS ah chuan telephone hmangin mithiam ten an harsatna te chinfel puiin harsatna nei te pawhin mahni inlum atangin mithiam an rawn thei a ni," tiin hun leh sum pawh a hek lo zawk niin a sawi a. TeleMANAS chu mipui ten an hre tanin pantu pawh an pungin an hmalakna chu a hlawhtling chho zel nia a hriat thu a sawi bawk.

Eng nge Tele-MANAS chu:

Tele Mental Health Assistance & Networking Across States (Tele-MANAS) hi Covid-19 hripui vanga rilru lama harsatna nei (mental distress)-te tanpui tura din a ni.

TeleMANAS hi October 10, 2022-ah sawrkar laipuiin bul a tan a ni.

TeleMANAS sum senso hi finance ministry-in kum thum chhung a tum dawn a, a hnuah National Health Mission-in a enkawl zui ang.

Mizoramah chuan Tele-MANAS hi Directorate of Hospital & Medical Education building-ah awmin December 30, 2022 khan hawn a ni.

Harsatna neite tan phone no. 14416-ah engtik lai pawhin biak theih a ni a. Mizoram tan chuan 14416 biak (dial) hnuah nghah hreta No. 1 (English) hmeh leh a, a hnuah No. 4 (Mizoram) hmeh leh tur a ni. Hindi-a be duh tan 14416 hmeh zawhah no. 2 hmeh tur a ni.