Aizawl: Health & Family Welfare Department atanga thudawn danin Haulawngah rannung seh 162 chuang hmuhchhuah a ni a, hmuhchhuah belh zel rin a ni. Public Health Entomologist Lalfakzuala Pautu chuan Zalen zawhna chhangin department chuan Haulawngah hian rannung seh hi a pung thut tih an sawi a, mi 162 hmuhchhuah tawh an ni tih sawiin an la pung leh zel dawn niin a sawi bawk. Rannung seh hmuhchhuahte hi mipa 72 leh hmeichhia 90 an ni. Lalfakzuala Pautu chuan rannung mihring sehtu hi tuhrik a nih thu a sawi a, hei hian sazu atangin kaiin mihringah a sehin mihringin an lo kai ta niin a sawi. Rannung seh pung thut zirchiang tur leh a tul anga hmala tur hian Lunglei CMO Office leh Aizawl Health Directorate atangin IDSP hote an kal a, rannung seh hmuhchhuahte zingah hian ngaihtuahawm lutuk an awm lo ni a thudawn a ni. Zirchiangtute hian rannung hi sazu natna a ni tih an sawi a. Haulawng khaw mipuite sazu thang an kamtir a, an sazu awhte hi zirin tunah hian sazu sehtu tuhrik sample chu Delhi-a National Centre for Disease Control (NCDC) ah thawn a ni dawn niin Zalen an hrilh bawk. Health department hotute chuan rannung seh tam thut (outbreak) hi kum 2015 atang khan kum tin a la awm a tih Zalen an hrilh a. Kum 2015-ah Falkawnah, 2016 ah Khawbung-ah, 2017 ah Phullenah leh tunah hian Haulawngah hian a rawn tam leh ta thut niin an sawi. Rannung seh hmuhchhuah tawh hi a pumpuiin Haulawng leh Phullena pung thar hluai tel lo hian kum 2012 atang khan record awm tanin mi 985 an ni a, thihpui hi mi 37 an ni tawh. Phullen-ah hian December, 2017 leh January, 2018 chhungin 60 hmuh belh an ni leh tawh bawk. Health department hotute chuan sazu tamna hmunah a tam niin an sawi a. Sazu hi tuhrikin seh lehin tuhrik hian mihring a seh leh a, hei hian natna chu a kai ta niin an sawi a. Sazuin mihringah an kai thei lo a, mihringin an mihringpuiah an kai thei lo bawk niin an sawi. Vaccine a awm lo tih sawiin health department hotute chuan hriatchhuah hma chuan enkawlna pek an ni a, an thihpui kher lo niin an sawi a. Hriatchhuah mai loh te chuan an thihpui thin niin an sawi. Scrub Typhus vei hmuh chhuah zawng zawng zaa 30.08 te hi Aizawl chhunga mi an ni a, veng 41 atangin record an nih thu heath department hotute hian an sawi bawk.