GQ chanchinbu chuan Dubai khawpuia Al Nahyan royal family hi khawvela hausa ber chhungkua nia tar langin Rs. vaibelchhe 4,078 man (Pentagon pathum tiat) lal in, private jet pariat leh football club lar tak an nei a ti.

MBZ tia an koh thin bawk, UAE President Sheikh Mohamed bin Zayed al Nahyan hi an chhungkaw hotu ber niin unau mipa 18 leh farnu 11 a nei a. Fa pakua neiin tu 18 a nei tawh bawk.

An chhungkua ringawt hian khawvel puma tuialhthei awm zinga 6% an nei a, Manchester City football club neitu an nih piah lamah company lian leh lar tak tak - zaithiam Rihanna-i incheina siam (beauty brand) Fenty atanga Elon Musk-a Space X thlengin chanpual an nei bawk.

Abu Dhabi lalpa nau, Sheikh Hamad bin Hamdan al Nahyan-a ringawt pawhin car 700 chuang neiin heng zingah hian SUV to ber ber chi a tel a. Bugatti Veyron pawh panga, Lamborghini Reventon, Mercedes-Benz CLK GTR, Ferrari 599XX leh McLaren MC12 te pawh a nei tel.

An chhungkua hian Abu Dhabu-a Qasr Al-Watan presidential palace-ah an cheng a, UAE hmun dangah lal in tam tak an nei bawk a. An chenna pui ber hi acre 94-a zau niin chandelier pakhat an khai phei chu crystal 3,50,000 chuang awmna niin an in chhunga thil hlu dang tam tak a awm bawk.

President unau dang, Tahnoun bin Zayed al Nahyan-a hi an chhungkaw investment company-a hotu ber a ni a. Company hi $ tluklehdingawn 235-a hlu niin agriculture, energy, entertainment leh tuipuia sumdawnnaah an inrawlh nasa a, thawk pawh sang tel an awm.

UAE maiah an duhtawk lo va, Dubai lal chhungkua hian hmun hrang hrang, Paris leh London thlengin hmun an nei a. An chhungkaw hotu ber ni thin phei kha chu UK-a hmun tha a lei nasat em avangin ‘landlord of London’ an ti hial thin a ni.

Kum 2015-a New Yorker-in a tar lan dan phei chuan UK-a Dubai lal chhungkaw neih hlut zawng leh British lal chhungkaw neih hlut a inhen reng an ti.

Kum 2008 khan MBZ-a Abu Dhabi United Group chuan UK football team Manchester City chu Rs. vaibelchhe 2,122-in an lei a. An company hian City Football Group-ah 81% zet chanpual neiin Mumbai City, Melbourne City leh New York City football club te thlengin neitu zingah an tel.