Kuminah Mizo film chhuak thar a awm nual tawh a, a awm belh zel dawn bawk e - August 25, 2022 hian 'Hawrawp Hnuhnung Ber' tih chu tlangzarh a ni dawn. A trailer pawh tihchhuah a ni tawh a, tunah hian editing an khawih mek a ni. 

Hmeichhe kut chhuak
'Hawrawp Hnuhnung Ber' director hi Melody G Fanai a ni a, hmeichhe kutchhuak film kan hmu dawn tihna a nih chu. Melody G Fanai chuan, "Mizo film hi zirtir nei deuh vek a ni thin a, tun tuma mi erawh a ni dawn lo. Rilru khawih tak leh zirtir nei tha chu a tha teh meuh mai, tun tuma mi erawh chutiang a ni dawn lo - hmuhnawm tawp tura siam a ni," tiin, an film kalphung tur a sawi. He film-ah hian action a tam viau dawn a nih hmel a, trailer en tawhte chuan kan hre theuh awm e.  

A changtu lam hi...
Film lama tawn hriat lo nei tawh leh mi thar an inpawlh nawk dawn a, hei tak hi en tichakawmtu pakhat a ni ang. Lemchan lama hming lo chher tawh Gospela Tlau te an awm laiin, a vawi khat nan RJ Mickey te an inlan dawn bawk - en chakawm tawh tak a ni. Gospela Tlau hi chu mi tam zawkin kan hmelhriat tawh, Scooty film leh film dang eng emaw zata lo inlan tawh a ni a, a reh deuh vang hnuah a rawn inlan leh dawn e. 

Call 112-a hnehsawh taka lo inlan tawh Eddie Tochhawng pawh kan hmu dawn a, zaithiam - Ronald Zothantluanga, Zirtluangpuii leh Lalthlengliani te an inlan cheu bawk. Ronald Zothantluanga hian 'Hawrawp Hnuhnung Ber' OST hi a sa nghe nghe a, Youth Icon 2019 top 5 Tlanmawia Ralte chuan background music a sa bawk. 

Anni bakah hian Miss Mizoram finalist hial lo ni tawh Hlutei a inlan dawn bawk a, comedy scene-ah Kungi leh Hrangi kan hmu dawn bawk - zirtir a nei lua lo a nih pawhin mit leh beng erawh a tlai dawn tih a chiang e!